കോഴിക്കോട്: പാറ്റ പാർട്ടിക്ക് പിന്നിൽ രാഷ്‌ട്രവിരുദ്ധ ശക്തികളാണെന്ന് അദ്വൈതാശ്രമം മഠാധിപതി സ്വാമി ചിദാനന്ദപുരി. നരേന്ദ്രമോദിയുടെ നേതൃത്വത്തിൽ ഭാരതം കൈവരിക്കുന്ന മുന്നേറ്റത്തിൽ അസ്വസ്ഥരായ ശക്തികളാണ് ഇത്തരം നീക്കങ്ങൾക്ക് പിന്നിൽ. കുട്ടികളുടെ വൈകാരികതയെ ചൂഷണം ചെയ്ത് അക്രമങ്ങൾ സൃഷ്ടിക്കാനും ജനാധിപത്യ സ്ഥാപനങ്ങളിലുള്ള വിശ്വാസം തകർക്കാനും ശ്രമങ്ങൾ നടക്കുന്നുണ്ടെന്നും സ്വാമി ചിദാനന്ദപുരി ചൂണ്ടിക്കാട്ടി.
ബംഗ്ലാദേശ്, നേപ്പാൾ, ശ്രീലങ്ക തുടങ്ങിയ അയൽരാജ്യങ്ങളിലെ രാഷ്‌ട്രീയ സംഭവവികാസങ്ങൾ പരാമർശിച്ച സ്വാമി ചിദാനന്ദപുരി, യുവസമൂഹത്തിന്റെ വൈകാരികതയെ ഉപയോഗപ്പെടുത്തി അക്രമങ്ങൾ അഴിച്ചുവിടാനുള്ള ശ്രമങ്ങൾ നടക്കുന്നുണ്ടെന്ന് പറഞ്ഞു. ഇത്തരം പ്രവർത്തനങ്ങളെ ഒരു പാർട്ടിയുടെയോ സംഘടനയുടെയോ പേരിൽ മാത്രം ഒതുക്കിക്കാണാനാകില്ലെന്നും അദ്ദേഹം അഭിപ്രായപ്പെട്ടു.
രാജ്യത്തിന്റെ നന്മ ലക്ഷ്യമിട്ട് കേന്ദ്രസർക്കാർ കൊണ്ടുവന്ന കാർഷിക നിയമങ്ങൾക്കെതിരായ സമരങ്ങളിലും പൗരത്വ ഭേദഗതി നിയമത്തിനെതിരായ പ്രതിഷേധങ്ങളിലും രാഷ്‌ട്രവിരുദ്ധതയുടെ സ്വഭാവം പ്രകടമായിരുന്നു. സമരങ്ങൾക്കൊപ്പം ജനങ്ങളിൽ വിശ്വാസമില്ലായ്മ വളർത്താനുള്ള ശ്രമങ്ങളും നടക്കുന്നുണ്ട്.
നിയമനിർമാണസഭ, ഭരണനിർവഹണ സംവിധാനം, നീതിന്യായ വ്യവസ്ഥ എന്നിവയുൾപ്പെടെയുള്ള ജനാധിപത്യ സ്ഥാപനങ്ങളിലുള്ള വിശ്വാസം നഷ്ടപ്പെട്ടാൽ ജനാധിപത്യത്തിന്റെ നിലനിൽപ്പ് തന്നെ അപകടത്തിലാകുമെന്ന് സ്വാമി ചിദാനന്ദപുരി മുന്നറിയിപ്പ് നൽകി. വ്യക്തികൾക്കെതിരെ പരാതികളോ ആരോപണങ്ങളോ ഉണ്ടെങ്കിൽ അവ ചോദ്യം ചെയ്യാൻ രാജ്യത്ത് നിയമപരമായ സംവിധാനങ്ങളുണ്ടെന്നും അദ്ദേഹം പറഞ്ഞു.
മുഖ്യ തിരഞ്ഞെടുപ്പ് കമ്മീഷണർക്കെതിരായ ആരോപണങ്ങൾ ഉൾപ്പെടെയുള്ള വിഷയങ്ങൾ നിയമവ്യവസ്ഥയ്‌ക്ക് മുന്നിൽ ഉന്നയിക്കുകയാണ് വേണ്ടത്. തെരുവുകളിൽ അക്രമം നടത്തുകയോ പോലീസുകാരെ ആക്രമിക്കുകയോ ചെയ്യുന്നത് അംഗീകരിക്കാനാവില്ലെന്നും അദ്ദേഹം വ്യക്തമാക്കി.
കുട്ടികളെ സംരക്ഷിക്കേണ്ടത് പ്രധാനമാണെങ്കിലും അവർ അക്രമത്തിൽ ഏർപ്പെട്ടാൽ നിയമപ്രകാരം നടപടിയെടുക്കേണ്ടത് സർക്കാരിന്റെ ഉത്തരവാദിത്വമാണെന്ന് സ്വാമി ചിദാനന്ദപുരി പറഞ്ഞു. അക്രമം നടത്തിയവർക്കെതിരെ കേസെടുക്കരുതെന്ന സമീപനം ക്രമസമാധാനത്തെ ബാധിക്കുമെന്നും അദ്ദേഹം അഭിപ്രായപ്പെട്ടു.
പൊതുക്രമം, പൊതുജനാരോഗ്യം, സദാചാരം എന്നിവയുമായി ബന്ധപ്പെട്ട ഭരണഘടനാപരമായ നിയന്ത്രണങ്ങൾക്കുള്ളിലാണ് വ്യക്തിസ്വാതന്ത്ര്യം നിലനിൽക്കുന്നത്. പൊതുക്രമം തകരുന്ന സാഹചര്യത്തിൽ അത് നിയന്ത്രിക്കാൻ സർക്കാരിന് ഉത്തരവാദിത്വമുണ്ട്. കേരളത്തിലെ ചില മാധ്യമങ്ങൾ അക്രമങ്ങളുമായി ബന്ധപ്പെട്ട സംഭവങ്ങൾ റിപ്പോർട്ട് ചെയ്യുമ്പോൾ ഏകപക്ഷീയമായ സമീപനം സ്വീകരിക്കുന്നുവെന്നും സ്വാമി ചിദാനന്ദപുരി വിമർശിച്ചു.
രാഷ്‌ട്രീയ പാർട്ടികൾ മാറിവന്നാലും സർക്കാർ ഭാരതത്തിന്റേതാണെന്നും ജനാധിപത്യ സംവിധാനത്തെ അട്ടിമറിക്കുന്ന ശ്രമങ്ങൾ രാജ്യത്തിന്റെ നിലനിൽപ്പിനെ ബാധിക്കുമെന്നും അദ്ദേഹം പറഞ്ഞു. ജനാധിപത്യ സ്ഥാപനങ്ങളിലുള്ള വിശ്വാസം സംരക്ഷിക്കേണ്ടത് എല്ലാവരുടെയും ഉത്തരവാദിത്വമാണെന്നും സ്വാമി ചിദാനന്ദപുരി കൂട്ടിച്ചേർത്തു.
