ന്യൂഡൽഹി: ഡൽഹിയിലെ പ്രമുഖ സിഖ് തീർഥാടന കേന്ദ്രമായ ഗുരുദ്വാര ബംഗ്ലാ സാഹിബ് പ്രതിഷേധ വേദിയാക്കിയെന്ന പരാതിയിൽ ആം ആദ്മി പാർട്ടി നേതാവ് അരവിന്ദ് കെജ്‌രിവാൾ ഉൾപ്പെടെയുള്ള നേതാക്കൾക്കും എംഎൽഎമാർക്കുമെതിരെ എഫ്‌ഐആർ രജിസ്റ്റർ ചെയ്ത് ഡൽഹി പോലീസ്. ഡൽഹി സിഖ് ഗുരുദ്വാര മാനേജ്‌മെന്റ് കമ്മിറ്റി നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്.
ഗുരുദ്വാരയിൽ കയറി മുദ്രവാക്യം വിളിക്കുന്ന എഎപി നേതാക്കളുടെ ദൃശ്യങ്ങൾ സമൂഹ മാധ്യമങ്ങളിൽ വ്യാപകമായി പ്രചരിച്ചിരുന്നു. ഗുരുദ്വാരയുടെ പരിസരത്ത് തടസ്സമുണ്ടാക്കിയെന്നും സംഭവത്തിന് പിന്നാലെ തെറ്റിദ്ധരിപ്പിക്കുന്ന വീഡിയോകളും സമൂഹമാധ്യമ പോസ്റ്റുകളും പ്രചരിപ്പിച്ചെന്നും പരാതിയിൽ പറയുന്നു. ആരാധനയ്‌ക്കും തീർഥാടകരുടെ സഞ്ചാരത്തിനും തടസ്സമുണ്ടാക്കുന്ന രീതിയിൽ സ്ഥലത്തെ പ്രതിഷേധക്കാരുടെ കാട്ടിക്കൂട്ടലുകൾ. പരാതിക്കൊപ്പം ചില വീഡിയോ ദൃശ്യങ്ങളും സമർപ്പിച്ചിട്ടുണ്ട്. ഇവ അന്വേഷണത്തിന്റെ ഭാഗമായി പരിശോധിച്ചുവരികയാണെന്ന് ഡൽഹി പോലീസ് അറിയിച്ചു.
