ന്യൂഡല്‍ഹി: കുട്ടിക്കാലത്ത് ആകാശത്തിലൂടെ പറന്നുപോകുന്ന യുദ്ധവിമാനങ്ങള്‍ നോക്കി അവ ചക്രവാളത്തില്‍ മറയുന്നതുവരെ പിന്നാലെ ഓടുമായിരുന്നു ഭാവന കാന്ത്. ആ കൗതുകം പിന്നീട് ഇന്ത്യന്‍ വ്യോമസേനയിലെ പോരാട്ടവിമാന പൈലറ്റിലേക്കും രാജ്യത്തിന്റെ സൈനിക വ്യോമയാന മേഖലയില്‍ പുതിയ ചരിത്രം കുറിക്കുന്ന നേട്ടത്തിലേക്കും അവരെ എത്തിച്ചു. 2026 ഓഗസ്റ്റില്‍ ഫൈറ്റര്‍ കോംബാറ്റ് ലീഡര്‍ യോഗ്യത നേടുന്ന ഇന്ത്യന്‍ വ്യോമസേനയിലെ ആദ്യ വനിതാ ഓഫീസറായി സ്‌ക്വാഡ്രണ്‍ ലീഡര്‍ ഭാവന കാന്ത് മാറി.
ഗ്വാളിയോറിലെ ടാക്റ്റിക്‌സ് ആന്‍ഡ് എയര്‍ കോംബാറ്റ് ഡെവലപ്‌മെന്റ് എസ്റ്റാബ്ലിഷ്‌മെന്റില്‍ (TACDE) നടത്തിയ ഉന്നത പരിശീലനം വിജയകരമായി പൂര്‍ത്തിയാക്കിയാണ് ഭാവന ഈ നേട്ടം സ്വന്തമാക്കിയത്. വ്യോമപോരാട്ടത്തിലെ തന്ത്രങ്ങള്‍, സങ്കീര്‍ണമായ ദൗത്യങ്ങളുടെ ആസൂത്രണം, നേതൃത്വം എന്നിവയില്‍ കൂടുതല്‍ വൈദഗ്ധ്യം നേടാന്‍ സഹായിക്കുന്നതാണ് ഫൈറ്റര്‍ കോംബാറ്റ് ലീഡര്‍ പരിശീലനം.
സായുധസേനയില്‍ ചേരുകയെന്നാല്‍ യുദ്ധവിമാനങ്ങള്‍ പറത്താനുള്ള അവസരം ലഭിക്കുമെന്നായിരുന്നു കുട്ടിക്കാലത്ത് ഭാവന കരുതിയിരുന്നത്. എന്നാല്‍, വനിതകള്‍ക്ക് യുദ്ധവിമാന പൈലറ്റാകാനുള്ള അവസരം അന്ന് ലഭ്യമായിരുന്നില്ലെന്ന കാര്യം അക്കാദമിയില്‍ എത്തിയ ശേഷമാണ് തിരിച്ചറിഞ്ഞത്. സ്ത്രീകള്‍ക്ക് യുദ്ധവിമാന വിഭാഗത്തില്‍ പ്രവേശനം അനുവദിച്ചിരുന്നില്ലെന്ന യാഥാര്‍ഥ്യം തന്റെ ലക്ഷ്യത്തെ മാറ്റിയില്ലെന്ന് അവര്‍ പറഞ്ഞിരുന്നു.
2016-ല്‍ വനിതകള്‍ക്കും യുദ്ധവിമാന പൈലറ്റുമാരാകാന്‍ ഇന്ത്യന്‍ വ്യോമസേന അവസരം തുറന്നതോടെയാണ് ഭാവനയുടെ സ്വപ്നത്തിന് പുതിയ വഴിതുറന്നത്. അവനി ചതുര്‍വേദി, മോഹന സിങ് എന്നിവര്‍ക്കൊപ്പം ഇന്ത്യയിലെ ആദ്യ മൂന്ന് വനിതാ ഫൈറ്റര്‍ പൈലറ്റുമാരില്‍ ഒരാളായി ഭാവനയും ചരിത്രത്തില്‍ ഇടംപിടിച്ചു.
2017-ല്‍ ഫൈറ്റര്‍ സ്‌ക്വാഡ്രണില്‍ ചേര്‍ന്ന ഭാവന 2018 മാര്‍ച്ചില്‍ മിഗ്-21 ബൈസണ്‍ യുദ്ധവിമാനത്തില്‍ ആദ്യമായി ഒറ്റയ്‌ക്ക് പറന്നു. 2019 മേയില്‍ പകല്‍സമയത്ത് യുദ്ധവിമാന ദൗത്യങ്ങള്‍ നിര്‍വഹിക്കാന്‍ യോഗ്യത നേടുന്ന ഇന്ത്യയിലെ ആദ്യ വനിതാ ഫൈറ്റര്‍ പൈലറ്റായി അവര്‍ മാറി.
2020-ല്‍ നാരീശക്തി പുരസ്‌കാരം ലഭിച്ച ഭാവന, 2021-ലെ റിപ്പബ്ലിക് ദിന പരേഡിലും വ്യോമസേനയുടെ ഫ്‌ലൈപാസ്റ്റിലും പങ്കെടുക്കുന്ന ആദ്യ വനിതാ ഫൈറ്റര്‍ പൈലറ്റെന്ന നേട്ടവും സ്വന്തമാക്കി. മിഗ്-21 ബൈസണില്‍ നിന്ന് സുഖോയ്-30എംകെഐ യുദ്ധവിമാനത്തിലേക്കുള്ള മാറ്റവും അവരുടെ കരിയറിലെ മറ്റൊരു പ്രധാന ഘട്ടമാണ്.
പുതിയ ഫൈറ്റര്‍ കോംബാറ്റ് ലീഡര്‍ യോഗ്യതയോടെ കൂടുതല്‍ സങ്കീര്‍ണമായ വ്യോമപോരാട്ട ദൗത്യങ്ങളിലും തന്ത്രപരമായ ആസൂത്രണത്തിലും നേതൃത്വം വഹിക്കാന്‍ ആവശ്യമായ പരിശീലനമാണ് ഭാവന നേടിയിരിക്കുന്നത്. വനിതകള്‍ക്ക് ഒരിക്കല്‍ അടഞ്ഞുകിടന്നിരുന്ന മേഖലയില്‍ പ്രവേശിച്ചതില്‍ മാത്രം ഒതുങ്ങുന്നതല്ല അവരുടെ നേട്ടം. തുടര്‍ച്ചയായ പരിശീലനത്തിലൂടെയും കഴിവ് തെളിയിച്ചും കൂടുതല്‍ ഉത്തരവാദിത്തങ്ങളിലേക്ക് മുന്നേറാമെന്നതിന്റെ ഉദാഹരണം കൂടിയാണ് ഈ യാത്ര.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
സായുധസേനയില്‍ കരിയര്‍ ആഗ്രഹിക്കുന്ന യുവതികള്‍ക്ക് ഭാവന നല്‍കുന്ന സന്ദേശവും ശ്രദ്ധേയമാണ്. പരാജയപ്പെടുമെന്നോ തെറ്റുകള്‍ വരുത്തുമ്പോള്‍ മറ്റുള്ളവര്‍ പരിഹസിക്കുമെന്നോ ഭയന്ന് ലക്ഷ്യങ്ങളില്‍നിന്ന് പിന്മാറരുതെന്നാണ് അവരുടെ ഉപദേശം.
