റോച്ചസ്റ്റർ: യുകെയിലെ മലയാളി സമൂഹത്തിന്റെ പ്രധാന ആരാധനാലയങ്ങളിലൊന്നായ കെന്റ് അയ്യപ്പ ക്ഷേത്രത്തിൽ നവരാത്രി ആഘോഷങ്ങൾ വിപുലമായ പരിപാടികളോടെ നടക്കും. ഒക്ടോബർ 18 മുതൽ 21 വരെയാണ് ആഘോഷങ്ങൾ സംഘടിപ്പിക്കുന്നത്. ഒക്ടോബർ 18ന് വൈകിട്ട് 5.30 മുതൽ 8.30 വരെ പൂജവയ്പ്പും നടക്കും.
നവരാത്രിയുടെ ഭാഗമായി ഒക്ടോബർ 18 ഞായറാഴ്ച വൈകിട്ട് 6 മുതൽ 8.30 വരെ ക്ഷേത്രാങ്കണത്തിൽ കലാസന്ധ്യ അരങ്ങേറും. പ്രശസ്തരായ കലാകാരന്മാർ അവതരിപ്പിക്കുന്ന നൃത്തപരിപാടികളാണ് കലാസന്ധ്യയുടെ പ്രധാന ആകർഷണം.
സുചിത്ര കൊച്ചുവീട്ടിൽ, അരുണിമ ജയൻ, വിനീത് വിജയകുമാർ പിള്ള, രമ്യ അരുണ്‍കൃഷ്ണൻ, കീർത്തന ജിതേഷ് എന്നിവർ പരിപാടികളിൽ പങ്കെടുക്കും. ഭരതനാട്യത്തിൽ ബിഎഫ്എ ബിരുദധാരിയായ സുചിത്ര കൊച്ചുവീട്ടിൽ ആർഎൽവി കുമാരിയുടെയും ഡോ. പത്മിനി കൃഷ്ണന്റെയും ശിഷ്യയാണ്. അരുണിമ ജയൻ സുന്ദരേശൻ മാസ്റ്ററുടെ ശിഷ്യയാണ്. കഥകളി കലാകാരനായ വിനീത് വിജയകുമാർ പിള്ള കലാമണ്ഡലം വിജയകൃഷ്ണൻ ഉണ്ണിത്താന്റെ ശിഷ്യനാണ്.
ദൂരദർശൻ ഗ്രേഡഡ് ആർട്ടിസ്റ്റും ‘ഹര സ്പേസ് ഫോർ ഡാൻസി’ന്റെ സ്ഥാപകയുമായ രമ്യ അരുണ്‍കൃഷ്ണൻ ഗുരു ഹരിപദ്മന്റെ ശിഷ്യയാണ്. ശാസ്ത്രീയ നർത്തകിയായ കീർത്തന ജിതേഷ് ഭരതനാട്യം ഗുരു കൃഷ്ണപ്രിയയുടെയും മോഹിനിയാട്ടം ഗുരു അഖില കൃഷ്ണന്റെയും കീഴിൽ പരിശീലനം നേടിയിട്ടുണ്ട്.
വിജയദശമി ദിനത്തിൽ വിദ്യാരംഭം
വിജയദശമി ദിനമായ ഒക്ടോബർ 21 ബുധനാഴ്ച രാവിലെ 10 മുതൽ ഉച്ചയ്‌ക്ക് 12 വരെ വിദ്യാരംഭ ചടങ്ങുകൾ നടക്കും. രാവിലെ ഗണപതിഹോമവും വിദ്യാരംഭവും ഉണ്ടായിരിക്കും. വൈകിട്ട് ദീപാരാധനയും നടക്കും.
കുട്ടികളെ ആദ്യാക്ഷരം കുറിക്കുന്ന ചടങ്ങിൽ പങ്കെടുപ്പിക്കാൻ ആഗ്രഹിക്കുന്നവർക്ക് മുൻകൂട്ടി രജിസ്റ്റർ ചെയ്യാം. ഗണപതിക്ക് വിശേഷാൽ ഒറ്റയപ്പം നിവേദ്യവും അയ്യപ്പനും മറ്റ് ദേവീദേവന്മാർക്കും വഴിപാടുകളും നടത്താനുള്ള സൗകര്യവുമുണ്ട്.
എല്ലാ ഭക്തജനങ്ങളെയും കുടുംബസമേതം ക്ഷേത്രത്തിലെ നവരാത്രി ആഘോഷങ്ങളിൽ പങ്കെടുക്കാൻ ക്ഷേത്ര കമ്മിറ്റി സ്വാഗതം ചെയ്തു.
കൂടുതൽ വിവരങ്ങൾക്ക്:
ഫോൺ: 07838170203, 07985245890
വെബ്സൈറ്റ്: www.kentayyappatemple.org
