കൊച്ചി: സിഎംആർഎൽ–എക്സാലോജിക് കേസുമായി ബന്ധപ്പെട്ട ഹവാല ഇടപാട് കേസിൽ വിജിലൻസ് എഫ്ഐആർ രജിസ്റ്റർ ചെയ്യാൻ ഉത്തരവിട്ട സിംഗിൾ ബെഞ്ച് വിധിക്കെതിരായ അപ്പീൽ നീക്കത്തിന് ഹൈക്കോടതിയുടെ അനുമതിയില്ല. പിണറായി വിജയനടക്കമുള്ളവർ നൽകിയ അപ്പീൽ അനുമതി ഹർജികൾ ഹൈക്കോടതി തള്ളി.
സിംഗിൾ ബെഞ്ച് ഉത്തരവ് നിയമപരമല്ലെന്നും തങ്ങളുടെ ഭാഗം കേൾക്കാതെയാണ് ഉത്തരവിട്ടതെന്നുമായിരുന്നു ഹർജിക്കാരുടെ വാദം. ഈ ഉത്തരവിനെ ചോദ്യം ചെയ്ത് അപ്പീൽ നൽകാൻ അനുമതി തേടിയാണ് ഇവർ ഹൈക്കോടതിയെ സമീപിച്ചത്.
ഹർജിക്കാർക്ക് അനുകൂലമായ നിലപാടാണ് സംസ്ഥാന സർക്കാരും സ്വീകരിച്ചിരുന്നത് . എന്നാൽ അപ്പീൽ നൽകാൻ അനുമതി നൽകരുതെന്ന എൻഫോഴ്സ്മെന്റ് ഡയറക്ടറേറ്റിന്റെ (ഇഡി) വാദം പരിഗണിച്ചാണ് ഹൈക്കോടതി ഹർജികൾ തള്ളിയത്.
സിഎംആർഎൽ–എക്സാലോജിക് ഇടപാടുകളുമായി ബന്ധപ്പെട്ട ഹവാല ആരോപണങ്ങളിലാണ് വിജിലൻസ് അന്വേഷണം ആവശ്യപ്പെട്ടുള്ള നിയമനടപടികൾ ഉണ്ടായത്. കേസിൽ എഫ്ഐആർ രജിസ്റ്റർ ചെയ്യാൻ സിംഗിൾ ബെഞ്ച് ഉത്തരവിട്ടിരുന്നു. ഈ ഉത്തരവിനെതിരെ അപ്പീൽ നടപടികളുമായി മുന്നോട്ടുപോകാനാണ് പിണറായി വിജയനടക്കമുള്ളവർ അനുമതി തേടിയത്.
എന്നാൽ അപ്പീൽ പരിഗണിക്കുന്നതിനുള്ള അനുമതി ഹർജികൾ തന്നെ ഹൈക്കോടതി തള്ളിയതോടെ സിംഗിൾ ബെഞ്ച് ഉത്തരവിനെതിരായ അവരുടെ നിയമനീക്കത്തിന് തിരിച്ചടിയായി.
മാസപ്പടി ഇടപാടുമായി ബന്ധപ്പെട്ട ആരോപണങ്ങളും വിജിലൻസ് അന്വേഷണ നടപടികളും നേരത്തേ തന്നെ രാഷ്‌ട്രീയ-നിയമ ചർച്ചകളിൽ ഇടംപിടിച്ചിരുന്നു. ഹൈക്കോടതിയുടെ പുതിയ തീരുമാനം കേസിലെ തുടർനടപടികളിലും ശ്രദ്ധേയമാകും.
