കോട്ടയം: കൈക്കൂലി വാങ്ങിയെന്ന പരാതികളുടെ അടിസ്ഥാനത്തില്‍ വൈക്കം സിഐ ഷമീര്‍ ഖാന്റെ ഓഫീസില്‍ വിജിലന്‍സ് പരിശോധന. ഔദ്യോഗിക ആവശ്യങ്ങള്‍ക്കായി സ്റ്റേഷനിലെത്തുന്നവരില്‍ നിന്ന് സിഐ പണം വാങ്ങുന്നുവെന്ന രഹസ്യവിവരത്തെ തുടര്‍ന്നാണ് കോട്ടയം വിജിലന്‍സ് സംഘം പരിശോധന നടത്തിയത്. വൈകുന്നേരത്തോടെ എത്തിയ സംഘം സ്റ്റേഷനിലെ വിവിധ ഫയലുകളും രേഖകളും പരിശോധിച്ചു. അസം സ്വദേശിയുടെ പേരില്‍ ബാങ്ക് അക്കൗണ്ട് ആരംഭിച്ച് അതുവഴി കൈക്കൂലി കൈപ്പറ്റിയെന്ന വിവരവും വിജിലന്‍സിന് ലഭിച്ചതായാണ് റിപ്പോര്‍ട്ട്. ഈ അക്കൗണ്ടിലേക്ക് പ്രധാനമായും മണ്ണ് മാഫിയയുമായി ബന്ധപ്പെട്ടവരും ടിപ്പര്‍ ഉടമകളുമാണ് പണം നിക്ഷേപിച്ചതെന്നാണ് ആരോപണം.
കൈക്കൂലിയായി ലഭിച്ച പണം പിന്‍വലിക്കാന്‍ ഹെല്‍മറ്റും മാസ്‌കും ധരിച്ച് എടിഎമ്മിലെത്തിയിരുന്നുവെന്നും വിജിലന്‍സിന് വിവരം ലഭിച്ചതായാണ് സൂചന. വൈക്കത്ത് ചുമതലയേറ്റിട്ട് രണ്ടര മാസം മാത്രമായ സിഐയുടെ അക്കൗണ്ടില്‍ രണ്ടര ലക്ഷം രൂപയിലേറെ എത്തിയിട്ടുണ്ടെന്നാണ് പ്രാഥമിക വിവരം. വിജിലന്‍സ് എസ്പിയുടെ നേതൃത്വത്തിലുള്ള സംഘം വൈക്കത്തെ കാനറാ ബാങ്ക് ശാഖയിലും പരിശോധന നടത്തി. സിഐ ഷമീര്‍ ഖാന്റെ ഫോണ്‍ വിജിലന്‍സ് കസ്റ്റഡിയിലെടുത്തിട്ടുണ്ട്. പരിശോധനയുമായി ബന്ധപ്പെട്ട കൂടുതല്‍ വിവരങ്ങള്‍ പുറത്തുവന്നിട്ടില്ല.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
കമ്പംമേട്ടില്‍ സിഐ ആയിരിക്കെ സ്ത്രീകളോട് അപമര്യാദയായി പെരുമാറിയെന്നും ഓട്ടോ ഡ്രൈവറെ പരസ്യമായി മുഖത്തടിച്ചെന്നും ഷമീര്‍ ഖാനെതിരെ നേരത്തേ ആരോപണങ്ങള്‍ ഉയര്‍ന്നിരുന്നതായും റിപ്പോര്‍ട്ടിലുണ്ട്.
