പാരിസ്: ഫ്രാൻസിൽ വിദ്യാർഥികൾ ആരംഭിച്ച പ്രതിഷേധം അക്രമ സമരമായി മാറിയതോടെ നിലപാട് വ്യക്തമാക്കി പ്രസിഡന്റ് ഇമ്മാനുവേൽ മാക്രോൺ. സമാധാനപരമായി സമരം ചെയ്യുന്നവരുടെ ആവശ്യങ്ങൾ ന്യായമാണെങ്കിലും പ്രതിഷേധത്തിന്റെ മറവിൽ നടക്കുന്ന അക്രമങ്ങൾ അംഗീകരിക്കാനാവില്ലെന്ന് അദ്ദേഹം പറഞ്ഞു.
ഔദ്യോഗിക ടെലിവിഷൻ ചാനലിലൂടെ രാജ്യത്തെ അഭിസംബോധന ചെയ്യുകയായിരുന്നു മാക്രോൺ. അക്രമസംഭവങ്ങളുടെ ദൃശ്യങ്ങൾ കണ്ട് കടുത്ത ദേഷ്യവും നാണക്കേടും തോന്നിയതായി അദ്ദേഹം വ്യക്തമാക്കി. തങ്ങളുടെ ആവശ്യങ്ങളും പരാതികളും മാന്യമായും സമാധാനപരമായും ഉന്നയിക്കുന്ന പൊതുജനങ്ങളെയും പൊതുമുതൽ നശിപ്പിക്കുകയും കടകൾ കൊള്ളയടിക്കുകയും ചെയ്യുന്ന അക്രമികളെയും ഒരുപോലെ കാണാനാവില്ലെന്നും അദ്ദേഹം പറഞ്ഞു.
അക്രമികൾക്കെതിരെ ശക്തമായ നടപടി
അക്രമങ്ങളിൽ ഏർപ്പെടുന്നവർക്കെതിരെ ശക്തമായ നിയമനടപടി സ്വീകരിക്കുമെന്ന് മാക്രോൺ മുന്നറിയിപ്പ് നൽകി. പൊതുമുതൽ നശിപ്പിക്കുന്നതും കടകൾ കൊള്ളയടിക്കുന്നതും തടയുന്നതിനായി പ്രതിഷേധ പ്രകടനങ്ങൾക്ക് നിരോധനം ഏർപ്പെടുത്തുന്നതും പരിഗണനയിലുണ്ടെന്ന് അദ്ദേഹം അറിയിച്ചു.
വിദ്യാർഥികളുടെ സമരത്തിലേക്ക് കടന്നുകയറിയ തീവ്ര ഇടതുപക്ഷ പ്രവർത്തകരും സ്ഥിരം കുറ്റവാളികളുമാണ് പൊതുമുതൽ കത്തിക്കുകയും കടകൾ കൊള്ളയടിക്കുകയും ചെയ്തതെന്നാണ് സർക്കാർ ആരോപണം. പ്രതിഷേധത്തിന്റെ പേരിൽ നടക്കുന്ന അക്രമങ്ങൾക്കെതിരെ നടപടി വേണമെന്ന നിലപാടാണ് സർക്കാർ സ്വീകരിച്ചിരിക്കുന്നത്.
സ്കൂളുകളുടെ വികസനം ആവശ്യപ്പെട്ട് സമരം
രാജ്യത്തെ സ്കൂളുകളുടെ അടിസ്ഥാന സൗകര്യങ്ങൾ വികസിപ്പിക്കുക, അധ്യാപകരുടെ ഒഴിവുകൾ നികത്തുക തുടങ്ങിയ ആവശ്യങ്ങൾ ഉന്നയിച്ചാണ് വിദ്യാർഥികൾ പ്രതിഷേധം ആരംഭിച്ചത്. പിന്നീട് സമരം വ്യാപകമായ അക്രമ സമരമായി മാറുകയായിരുന്നു.
