ന്യൂഡൽഹി: ബിജെപി അധികാരത്തിൽനിന്ന് പുറത്തായാൽ ഇന്ത്യയിലേക്ക് മടങ്ങുമെന്ന് ഇന്ത്യ പിടികിട്ടാപ്പുള്ളിയായി പ്രഖ്യാപിച്ച വിവാദ ഇസ്ലാമിക പ്രഭാഷകൻ സക്കീർ നായിക്. ഇന്ത്യയിലേക്ക് മടങ്ങുന്നതിനെക്കുറിച്ചുള്ള ചോദ്യത്തിന് “After BJP goes” എന്നായിരുന്നു കൊടുംഭീകരൻ നായിക്കിന്റെ മറുപടി.
2029-ലെ ലോക്‌സഭാ തിരഞ്ഞെടുപ്പിന് മുമ്പ് ബിജെപി അധികാരത്തിൽനിന്ന് പുറത്താകുമെന്ന പ്രതീക്ഷയും നായിക് പങ്കുവെക്കുന്നുണ്ട്. രാഹുൽ മോദിയേക്കാൾ മികച്ചതാണെന്നും ഇയാൾ പറയുന്നുണ്ട്. ഇന്ത്യ വിട്ടതിനുശേഷം മലേഷ്യയിലാണ് നായിക് കഴിയുന്നത്. ഇയാൾക്കെതിരെ എൻഐഎ-ഇഡി കേസുകൾ നിലവിലുണ്ട്. ദേശീയ മാധ്യമമായ റിപ്പബ്ലിക് ചാനൽ നടത്തിയ ഒളിക്യാമറ ഓപ്പറേഷനിലാണ് വെളിപ്പെടുത്തൽ.
കോൺഗ്രസും നെഹ്റു കുടുംബവുമായി അടുത്ത ബന്ധമാണ് സാക്കീർ നായിക്കിനുള്ളത്. നായിക്കിന്റെ ഇസ്ലാമിക് റിസർച്ച് ഫൗണ്ടേഷനും (ഐആർഎഫ്) നെഹ്റു കുടുംബത്തിന്റെ ചാരിറ്റബിൾ ട്രസ്റ്റുകളും തമ്മിൽ സാമ്പത്തിക ഇടപാട് നടന്നതായി റിപ്പോർട്ടുകളുണ്ടായിരുന്നു.
2011ൽ യുപിഎ ഭരണകാലത്ത് സാക്കിർ നായിക്കിന്റെ ഫൗണ്ടേഷനിൽനിന്ന് രാജീവ് ഗാന്ധി ചാരിറ്റബിൾ ട്രസ്റ്റിന് 50 ലക്ഷം രൂപ നൽകിയതായി ഇഡി കണ്ടെത്തിയിരുന്നു. സോണിയയുടെ നേതൃത്വത്തിൽ 2002ലാണ് ട്രസ്റ്റ് സ്ഥാപിതമായത്. സാക്കിർ നായിക്കിനെതിരെ ദേശീയ അന്വേഷണ ഏജൻസി (എൻഐഎ) കേസ് രജിസ്റ്റർ ചെയ്തതും ഇതേ കാലയളവിലാണ്. പണം കൈമാറിയതിന്റെയും തിരികെ നൽകിയതിന്റെയും സാഹചര്യങ്ങൾ രാഷ്‌ട്രീയ വിവാദത്തിന് വഴിവച്ചിരുന്നു.
20 ദശലക്ഷത്തിലധികം ഫോളോവേഴ്‌സുള്ള പീസ് ടിവി ചാനലിലൂടെയും സോഷ്യൽ മീഡിയ പ്ലാറ്റ്‌ഫോമുകളിലൂടെയും നിരന്തരം ഇതരമത വിദ്വേഷം ഇയാൾ അഴിച്ചുവിടാറുണ്ട്. ഇയാളുടെ ചാനലിനും സോഷ്യൽ മീഡിയയും ഇന്ത്യയിൽ കേന്ദ്രസർക്കാർ നിരോധിച്ചിരുന്നു.
