ഇടുക്കി: തൊടുപുഴയിൽ തട്ടുകടയുടെ മറവിൽ കഞ്ചാവ് കച്ചവടം നടത്തിയ സിപിഎം നേതാവ് ഉൾപ്പെടെ മൂന്നുപേർ പിടിയിൽ. സിപിഎം മുതലക്കോടം ലോക്കൽ കമ്മിറ്റിയംഗവും സിഐടിയു തൊടുപുഴ ഏരിയാ കമ്മിറ്റിയംഗവുമായ സിജോ വർഗീസും കൂട്ടാളികളുമാണ് അറസ്റ്റിലായത്. കോളജ് വിദ്യാർത്ഥികളെ കേന്ദ്രീകരിച്ചായിരുന്നു കഞ്ചാവ് വിൽപ്പന.
തൊടുപുഴ നഗരത്തിൽ ഇടുക്കി പ്രസ് ക്ലബ്ബിന് സമീപം തട്ടുകട നടത്തുന്ന പെരുമ്പള്ളിച്ചിറ മടത്തിക്കണ്ടം കണ്ണാത്തുകുഴിയിൽ സിജോ ജോർജിന്റെ വീട്ടിൽ നടത്തിയ പരിശോധനയിൽ ഒന്നര കിലോയിലധികം കഞ്ചാവ് പിടികൂടിയിട്ടുണ്ട്. കഞ്ചാവ് വിൽപനയ്‌ക്കെതിരായ ‘ഓപ്പറേഷൻ തൂഫാൻ’ പരിശോധനയുടെ ഭാഗമായാണ് നടപടി.
പിടിയിലായ എറണാകുളം കാക്കനാട് സ്വദേശി യാസിൻ അഷ്റഫ്, എരുമേലി കനകപ്പാലം സ്വദേശി ആഷിഖ് അൻസാരി എന്നിവർ സിജോ ജോർജിന്റെ തട്ടുകടയിലെ ജീവനക്കാരാണ്. പെരുമ്പാവൂരിൽനിന്ന് സിജോയ്‌ക്ക് കഞ്ചാവ് എത്തിച്ചിരുന്നത് ആഷിഖ് അൻസാരിയാണെന്നും വിൽപനയ്‌ക്ക് സഹായിച്ചിരുന്നത് യാസിൻ അഷ്റഫാണെന്നുമാണ് പൊലീസിന്റെ കണ്ടെത്തൽ.
നഗരമധ്യത്തിലെ ഇവരുടെ തട്ടുകടയുടെ മറവിലായിരുന്നു ലഹരിക്കച്ചവടം. കോളേജ് വിദ്യാർഥികൾക്കും സ്ഥിരം ഇടപാടുകാർക്കുമാണ് സിജോ കഞ്ചാവ് നൽകിയിരുന്നതെന്നാണ് വിവരം. തൊടുപുഴയിലെയും സമീപപ്രദേശങ്ങളിലെയും കോളേജുകൾ കേന്ദ്രീകരിച്ച് കഞ്ചാവ് വിൽപന നടക്കുന്നുവെന്ന രഹസ്യവിവരത്തെ തുടർന്ന് കഴിഞ്ഞ ഒരു മാസമായി സിജോ പൊലീസ് നിരീക്ഷണത്തിലായിരുന്നു. നേരത്തെയും ഇയാൾക്കെതിരെ പരാതികൾ ലഭിച്ചിരുന്നെങ്കിലും തെളിവുകൾ കണ്ടെത്താനായിരുന്നില്ല. തട്ടുകടകൾ കേന്ദ്രീകരിച്ചും വിദ്യാഭ്യാസ സ്ഥാപനങ്ങളുടെ പരിസരങ്ങളിലും ലഹരിവിൽപന നടക്കുന്നുണ്ടോയെന്ന് കണ്ടെത്താൻ പരിശോധന ശക്തമാക്കാനാണ് പൊലീസിന്റെ തീരുമാനം.
