കേരളത്തിന്റെ ഇരുപത്തിമൂന്നാമത്തെ ഗവർണറായ പി സദാശിവത്തിന്റെ ജന്മനാളാണിന്ന്. ഭാരതത്തിന്റെ നാൽപ്പതാമത് സുപ്രീം കോടതി ചീഫ് ജസ്റ്റിസ് ആയിരുന്ന പി.സദാശിവത്തിന്റെ മുഴുവൻ പേര് പഴനിചാമി സദാശിവം എന്നാണ്.
തമിഴ്നാട്ടിലെ ഈറോഡ് ജില്ലയിൽ, കടപ്പാനല്ലൂർ, പവാനിയിൽ 1949 ഏപ്രിൽ 27നാണ് പി. സദാശിവം ജനിച്ചത്. 1977ൽ അഭിഭാഷകജീവിതം ആരംഭിച്ച സദാശിവം മദ്രാസ് ഹൈക്കോടതിയിലെ തന്റെ ദീർഘകാല അഭിഭാഷകജീവിതത്തിനു ശേഷം, ഹൈക്കോടതി സ്ഥിരം ജഡ്ജിയായി നിയമിതനായി. മദ്രാസ് ഹൈക്കോടതി കൂടാതെ, പഞ്ചാബ്, ഹരിയാന തുടങ്ങിയ സംസ്ഥാനങ്ങളിലെ ഹൈക്കോടതികളിലും സേവനമനുഷ്ഠിച്ചിട്ടുണ്ട്. 2007 ആഗസ്റ്റ് 21നാണ് സുപ്രീം കോടതി ജഡ്ജിയായി ചുമതലയേൽക്കുന്നത്. 2014 ഏപ്രിൽ 27 വരെയായിരുന്നു അദ്ദേഹത്തിന്റെ കാലാവധി.
ഭാരതത്തിന്റെ പരമോന്നത നീതിപീഠത്തിന്റെ സാരഥ്യം വഹിക്കുന്ന ആദ്യ തമിഴ്നാട്ടുകാരനാണ് പി.സദാശിവം. അതേപോലെ തന്നെ ഭാരതത്തിലെ ഒരു സംസ്ഥാനത്തിന്റെ ഗവർണർ പദവി ലഭിക്കുന്ന ആദ്യ സുപ്രീം കോടതി ചീഫ് ജസ്റ്റിസ് എന്ന സവിശേഷതയും അദ്ദേഹത്തിന് അവകാശപ്പെട്ടതാണ്.
മുൻ മന്ത്രി ആർ. ബാലകൃഷ്ണപിളളയ്ക്കു ശിക്ഷ ലഭിച്ച ഇടമലയാർ കേസ്, 1993ലെ മുംബൈ സ്ഫോടനക്കേസ്, ജെസീക്ക ലാൽ കൊലക്കേസ് തുടങ്ങിയ സുപ്രധാന കേസുകളിൽ വിധിന്യായം പുറപ്പെടുവിച്ചിട്ടുണ്ട് ഇദ്ദേഹം.
ശ്രീമതി സരസ്വതി സദാശിവം ആണ് ഇദ്ദേഹത്തിന്റെ സഹധർമ്മിണി.
