യൂറോ കപ്പ് നേടിയ പോർച്ചുഗൽ ടീമിന് നാട്ടിൽ ഉജ്വല വരവേൽപ്പ്. ആയിരങ്ങളാണ് ടീമിന് നൽകിയ സ്വീകരണ പരിപാടികളിൽ പങ്കെടുക്കാനായി ലിസ്ബണിലെത്തിയത്.
ആദ്യ യൂറോ കിരീടം നേടി നാട്ടിലെത്തിയ പോർച്ചുഗലിന് ആവേശകരമായ വരവേൽപ്പാണ് തലസ്ഥാനമായ ലിസ്ബണിൽ ലഭിച്ചത്. കോച്ച് ഫെർണാൻഡോ സാന്‍റോസിനും ക്യാപ്റ്റ്യൻ ക്രിസ്റ്റ്യാനോ റൊണാൾഡോയ്‌ക്കുമൊപ്പം ടീം പോർച്ചുഗലിന്‍റെ മണ്ണിലേക്കിറങ്ങി.
പിന്നീട് തുറന്ന വാഹനത്തിൽ ചാമ്പ്യൻ ടീമിന്‍റെ പര്യടനം. പാതയ്‌ക്കിരുവശത്തുനിന്നും ആരാധകർ ടീമിനെ വരവേറ്റു. പിന്നെ പ്രസിഡന്‍റിന്‍റെ കൊട്ടാരത്തിലേക്ക്. ടീമിന് പ്രസിഡന്‍റ് മാർസലോ റിബലോ ഡി സൂസ അകമഴിഞ്ഞ് അഭിനന്ദിച്ചു. പോർച്ചുഗൽ തലസ്ഥാനമായ ലിസ്ബണിൽ വിമാനമിറങ്ങിയ ടീമിനെ വരവേൽക്കാനെത്തിയത് ആയിരക്കണക്കിന് ജനങ്ങളാണ്.
യൂറോ കപ്പ് ഫൈനലിൽ ഫ്രാൻസിനെ ഏകപക്ഷീയമായ ഒരു ഗോളിന് തകർത്താണ് പോർച്ചുഗൽ ചരിത്രത്തിലെ ആദ്യ കിരീടം സ്വന്തമാക്കിയത്.
