ബോൾട്ടൺ: ഭാരതത്തിന്റെ ബോക്സിംഗ് താരം വിജേന്ദർ സിംഗിന്റെ കരിയർ തകർക്കുമെന്നു വെല്ലു വിളിച്ച് പാക് വംശജനായ ബ്രിട്ടീഷ് ബോക്സർ ആമിർ ഖാൻ. എന്നെപ്പോലെയുള്ള വലിയ പേരുകൾ പറയുന്നതിനു മുൻപ് വിജേന്ദർ ഇനിയും പരിചയം സമ്പാദിക്കേണ്ടതുണ്ട് എന്നാണ് ഇരുപത്തിയൊൻപതുകാരനായ ആമിർ ഖാന്റെ പരിഹാസം നിറഞ്ഞ വെല്ലുവിളി.
രണ്ടു പ്രാവശ്യം ലോക ചാമ്പ്യനായ ആമിർ ഖാൻ കൈത്തണ്ടയിലുണ്ടായ ശസ്ത്രക്രിയയേത്തുടർന്ന് വിശ്രമത്തിലാണ്. വിജേന്ദർ സിംഗുമായുള്ള മത്സരം ഇന്ത്യാ-പാക് ക്രിക്കറ്റ് പോലെയായിരിക്കുമെന്നും ആമിർ താരതമ്യപ്പെടുത്തി.
അതേസമയം, വിജേന്ദറിന്റെ ബോക്സിംഗ് പ്രകടനത്തെ അഭിനന്ദിക്കാതിരിക്കാനും ആമിറിനു കഴിഞ്ഞില്ല. അതോടൊപ്പം വിജേന്ദർ സിംഗുമായി നല്ല സൗഹൃദം കാത്തു സൂക്ഷിക്കാൻ താൻ ആഗ്രഹിക്കുന്നുവെന്നും ആമിർ കൂട്ടിച്ചേർത്തു. വിജേന്ദറുമായി ഒരു മത്സരം ഉണ്ടാകാത്ത പക്ഷം, താൻ വിജേന്ദറിന്റെ പക്ഷം ചേരാൻ ആഗ്രഹിക്കുന്നുവെന്നും ആമിർ ഖാൻ വെളിപ്പെടുത്തി.
