ധര്‍മ്മശാല: ധര്‍മ്മശാല ഏകദിനത്തില്‍ ന്യൂസിലന്‍ഡിനെതിരേ ഇന്ത്യയ്ക്ക് ആറ് വിക്കറ്റ് വിജയം. കീവിസ് ഉയര്‍ത്തിയ 191 റണ്‍സ് വിജയലക്ഷ്യം 17 ഓവര്‍ ബാക്കി നില്‍ക്കെ ഇന്ത്യ മറികടന്നു. കീവിസ് ബാറ്റിംഗ് നിരയെ തകര്‍ത്ത അരങ്ങേറ്റക്കാരന്‍ ഹാര്‍ദ്ദിക് പാണ്ഡ്യയാണ് കളിയിലെ കേമന്‍.
ടോസ് നഷ്ടപ്പെട്ട് ആദ്യം ബാറ്റ് ചെയ്യേണ്ടിവന്ന കീവിസ് നിര 190 റണ്‍സുമായി കൂടാരം കയറി. നായകന്‍ കെയ്ന്‍ വില്യംസണ്‍ അടക്കം 6 ബാറ്റ്‌സ്മാന്‍മാര്‍ രണ്ടക്കം കാണാതെയാണ് പുറത്തായത്. ഹാര്‍ദ്ദിക് പാണ്ഡ്യയും അമിത് മിശ്രയുമാണ് കീവിസിന്റെ ചിറകരിഞ്ഞത്. ഇരുവരും മൂന്ന് വിക്കറ്റുകള്‍ വീതം വീഴ്‌ത്തി. ഉമേഷ് യാദവും കേദാര്‍ യാദവും രണ്ട് വിക്കറ്റുകള്‍ വീതവും വീഴ്‌ത്തി.
79 റണ്‍സ് നേടിയ ടോം ലാഥം ആണ് കിവീസ് നിരയിലെ ടോപ് സ്‌കോറര്‍. ടിം സൗത്തി 55 റണ്‍സും നേടി. 191 റണ്‍സ് വിജയലക്ഷ്യം പിന്തുടര്‍ന്ന ഇന്ത്യയ്ക്ക് വിരാട് കൊഹ്‌ലിയുടെ മികച്ച ഇന്നിംഗ്‌സ് ആണ് അനായസ ജയം സമ്മാനിച്ചത്.
കൊഹ്‌ലി പുറത്താകാതെ 85 റണ്‍സ് എടുത്തു. രഹാനെ 33 ഉം ധോനി 21 ഉം റണ്‍സുമായി കൊഹ്‌ലിയ്‌ക്ക് പിന്തുണ നല്‍കി. അഞ്ച് മത്സരങ്ങളാണ് പരമ്പരയില്‍ ഉളളത്. ഇന്നത്തെ വിജയത്തോടെ ഇന്ത്യ 1-0 ത്തിന് മുന്നിലാണ്.
