ചാറ്റിംഗ് ആപ്ലിക്കേഷനായ വാട്ട്സ് ആപ്പിൽ ഇനിമുതൽ വീഡിയോ കോളിംഗ് സൗകര്യവും ലഭ്യമാകും. വാട്ട്സ് ആപ്പിന് ഏറ്റവുമധികം ഉപയോക്താക്കളുളള ഭാരതത്തിലാണ് ആദ്യമായി ഈ സൗകര്യം അവതരിപ്പിച്ചത്. എന്നാൽ ഏതാനും മണിക്കൂറുകൾക്കുളളിൽ തന്നെ മറ്റു രാജ്യങ്ങളിലേയ്ക്കും ഈ സൗകര്യം വ്യാപിപ്പിക്കുമെന്നാണ് വാട്ട്സ് ആപ്പ് അറിയിച്ചിരിക്കുന്നത്.
ആൻഡ്രോയിഡ്, ഐ.ഒ.എസ്, വിൻഡോസ് തുടങ്ങിയ എല്ലാ ഓപ്പറേറ്റിംഗ് സിസ്റ്റങ്ങളിലും വീഡിയോ കോളിംഗ് സൗകര്യം ലഭ്യമാകും. ഇതിനായി ആപ്പ് അപ് റ്റു ഡേറ്റ് ആക്കേണ്ടതുണ്ട്. വാട്ട്സ് ആപ്പിന്റെ പുതിയ വേർഷൻ അപ്ഡേറ്റ് ചെയ്യുക വഴി ഇതു സാദ്ധ്യമാകും.
സാധാരണ വാട്ട്സ് ആപ്പിൽ കോൾ ചെയ്യാൻ ഉപയോഗിക്കുന്ന ഐക്കണിൽ ക്ലിക്ക് ചെയ്താൽ ഇനി മുതൽ വോയിസ് കോൾ, വീഡിയോ കോൾ എന്നിങ്ങനെ രണ്ട് ഓപ്ഷനുകൾ ലഭ്യമാകും. ഉപയോക്താവിന്റെ ആവശ്യമനുസരിച്ച് വോയിസ് കോൾ ആണോ വീഡിയോ കോൾ ആണോ എന്നത് തിരഞ്ഞെടുക്കാം. വാട്ട്സ് ആപ്പ് അപ്ഡേറ്റ് ചെയ്തിട്ടും വീഡിയോ കോൾ സൗകര്യം ലഭിച്ചില്ലെങ്കിലും ഏതാനും സമയത്തിനുളളിൽ തന്നെ ഈ സൗകര്യം ലഭ്യമായിത്തുടങ്ങും. കോൾ ചെയ്യുമ്പോൾ തന്നെ ഫോണിന്റെ ഫ്രണ്ട് ക്യാമറയും, റിയർ ക്യാമറയും മാറിമാറി ഉപയോഗിക്കാനുളള സൗകര്യവും വാട്ട്സ് ആപ്പ് നൽകുന്നുണ്ട്.
വേഗത കുറഞ്ഞ ഇന്റർനെറ്റ് കണക്ടിവിറ്റിയുളള ഇന്ത്യ പോലെയുളള സ്ഥലങ്ങൾക്കും അനുയോജ്യമായ രീതിയിലാണ് വാട്ട്സ് ആപ്പിന്റെ വീഡിയോ കോളിംഗ് സജ്ജീകരിച്ചിരിക്കുന്നത്.