‘രോഹിത് ശര്‍മ്മ ഇന്ത്യന്‍ ടീമില്‍ തുടരും’; ലോര്‍ഡ്‌സിലെ അവസാന ഏകദിനമല്ല; അഭ്യൂഹങ്ങള്‍ തള്ളി ബിസിസിഐ

ഹൈദരാബാദ്: ഇന്ത്യയുടെ മുന്‍ നായകന്‍ രോഹിത് ശര്‍മ്മയുടെ ഏകദിന വിരമിക്കലിനെച്ചൊല്ലിയ അഭ്യൂഹങ്ങള്‍ തള്ളി ബിസിസിഐ. ഇംഗ്ലണ്ടിനെതിരായ ലോര്‍ഡ്‌സില്‍ നടക്കുന്ന മൂന്നാം ഏകദിനം രോഹിത്തിന്റെ അവസാന ഏകദിന മത്സരമാകുമെന്ന തരത്തില്‍ പ്രചരിക്കുന്ന റിപ്പോര്‍ട്ടുകള്‍ക്ക് യാതൊരു അടിസ്ഥാനവുമില്ലെന്ന് ബിസിസിഐ സെക്രട്ടറി ദേവജിത് സൈകിയ വ്യക്തമാക്കി.

‘രോഹിത് ശര്‍മ്മയുടെ ഭാവിയെക്കുറിച്ച് മാധ്യമങ്ങളില്‍ നിരവധി അഭ്യൂഹങ്ങള്‍ പ്രചരിക്കുന്നുണ്ട്. എന്നാല്‍ ലോര്‍ഡ്‌സില്‍ നടക്കുന്ന മത്സരം അദ്ദേഹത്തിന്റെ അവസാന ഏകദിനമാണെന്ന തരത്തില്‍ ബിസിസിഐയില്‍ യാതൊരു ചര്‍ച്ചയും നടന്നിട്ടില്ല,’ എന്ന് അദ്ദേഹം പറഞ്ഞു. പിടിഐയോട് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.

രോഹിത് ഇപ്പോഴും ഇന്ത്യന്‍ ഏകദിന ടീമിലെ സ്ഥിരാംഗമാണെന്നും, ടീമിന്റെ ഭാവി പദ്ധതികളില്‍ ഉള്‍പ്പെടുന്നിടത്തോളം കാലം അദ്ദേഹം ഇന്ത്യയ്‌ക്കായി കളി തുടരുമെന്നും സൈകിയ വ്യക്തമാക്കി. അതിനാല്‍ ലോര്‍ഡ്‌സിലെ മത്സരം അദ്ദേഹത്തിന്റെ അവസാന ഏകദിനമല്ലെന്നും അദ്ദേഹം കൂട്ടിച്ചേര്‍ത്തു. മൂന്നാം ഏകദിനത്തിന് ശേഷം യുവതാരം യശസ്വി ജയ്‌സ്വാളിന് കൂടുതല്‍ അവസരം നല്‍കാനായി സെലക്ടര്‍മാര്‍ രോഹിത്തിനോട് മുന്നോട്ടുള്ള പദ്ധതികള്‍ അറിയിച്ചുവെന്ന തരത്തില്‍ നേരത്തെ റിപ്പോര്‍ട്ടുകള്‍ പുറത്തുവന്നിരുന്നു. ഈ വാര്‍ത്തകള്‍ക്ക് പിന്നാലെയാണ് ബിസിസിഐയുടെ ഔദ്യോഗിക വിശദീകരണം.

“There are lot of speculations going on in media about Rohit Sharma’s future. I want to firmly assert that there has been no such discussion that Rohit will be playing his last match at Lord’s on Sunday. Rohit is a regular member of the Indian ODI team and he will continue to… pic.twitter.com/qpCQigZmXV

— Press Trust of India (@PTI_News) July 17, 2026

ചില ദേശീയ മാധ്യമങ്ങളുടെ റിപ്പോര്‍ട്ടുകള്‍ പ്രകാരം, രോഹിത്തിന്റെ ഭാവിയെ സംബന്ധിച്ച് സെലക്ഷന്‍ കമ്മിറ്റി ചെയര്‍മാന്‍ അജിത് അഗാര്‍ക്കറും മുഖ്യപരിശീലകന്‍ ഗൗതം ഗംഭീറും സ്വീകരിച്ച സമീപനത്തില്‍ ബിസിസിഐ നേതൃത്വത്തിന് അതൃപ്തിയുണ്ടായിരുന്നുവെന്നും, വിവിധ തലങ്ങളില്‍ നടന്ന ചര്‍ച്ചകള്‍ക്കൊടുവിലാണ് വിഷയത്തില്‍ വ്യക്തത വരുത്താന്‍ തീരുമാനിച്ചതെന്നും സൂചനകളുണ്ട്. എന്നാല്‍ ഇക്കാര്യത്തില്‍ ബിസിസിഐ ഔദ്യോഗിക സ്ഥിരീകരണം നല്‍കിയിട്ടില്ല.

അതേസമയം, ഇംഗ്ലണ്ടിനെതിരായ നിലവിലെ ഏകദിന പരമ്പരയില്‍ രോഹിത്തിന് ഇതുവരെ വലിയ സ്‌കോറുകള്‍ കണ്ടെത്താനായിട്ടില്ല. ആദ്യ രണ്ട് മത്സരങ്ങളില്‍ 11 ഉം 26 ഉം റണ്‍സുകളാണ് അദ്ദേഹം നേടിയത്. കഴിഞ്ഞ അഞ്ച് ഏകദിന ഇന്നിങ്സുകളില്‍ അഫ്ഗാനിസ്ഥാനെതിരെ നേടിയ 79 റണ്‍സ് മാത്രമാണ് ശ്രദ്ധേയ പ്രകടനം. അടുത്തിടെ സമാപിച്ച ഐപിഎല്‍ സീസണിലും മുംബൈ ഇന്ത്യന്‍സിനായി രോഹിത് പ്രതീക്ഷിച്ച പ്രകടനം പുറത്തെടുത്തിരുന്നില്ല.