മുംബൈ: ഇഗ്ലണ്ടിനെതിരായ മൂന്നാം ടെസ്റ്റിനുള്ള ടീമില് വിക്കറ്റ് കീപ്പര് ബാറ്റ്സ്മാന് പാര്ഥിവ് പട്ടേലിനെ ഉള്പ്പെടുത്തി. വൃദ്ധിമാന് സാഹയ്ക്ക് പരിക്കേറ്റതിനെ തുടര്ന്നാണ് പാര്ഥിവിനെ ടീമില് ഉള്പ്പെടുത്തിയത്.
എട്ട് വര്ഷങ്ങള്ക്ക് ശേഷമാണ് പാര്ഥിവ് പട്ടേല് ഇന്ത്യന് ടെസ്റ്റ് ടീമില് ഇടം പിടിക്കുന്നത്. ഇരുപത് തവണ ടെസ്റ്റ് കുപ്പായമണിഞ്ഞിട്ടുള്ള 31 കാരനായ പാര്ഥിവ് പട്ടേല് 2008 ആഗസ്റ്റിലാണ് ഇന്ത്യയ്ക്കുവേണ്ടി അവസാനമായി ടെസ്റ്റ് കളിച്ചത്. 2012 ഫെബ്രുവരിയിലാണ് അവസാന ഏകദിനം കളിച്ചത്.
ശനിയാഴ്ച മൊഹാലിയിലാണ് മൂന്നാം ടെസ്റ്റ്. അഞ്ച് ടെസ്റ്റുകളുടെ പരമ്പരയില് രണ്ടാം ടെസ്റ്റ് വിജയിച്ച ഇന്ത്യ 1-0ന് മുന്നിട്ടു നില്ക്കുകയാണ്. ആദ്യ ടെസ്റ്റ് സമനിലയില് കലാശിക്കുകയായിരുന്നു.
