കൊച്ചി: ഐഎസ്എല്ലിൽ കേരള ബ്ലാസ്റ്റേഴ്സിന് ഇന്ന് നിർണായക മത്സരം. പൂനെ സിറ്റിക്കെതിരെ സ്വന്തം തട്ടകത്തിലാണ് ബ്ലാസ്റ്റേഴ്സ് ഇന്ന് ഇറങ്ങുക. സെമി പ്രവേശനം ഉറപ്പാക്കാൻ കൊമ്പന്മാർക്ക് മികച്ച ജയം തന്നെ വേണം.
പതിനൊന്ന് കളികളില് നിന്ന് നാല് ജയവും നാല് തോല്വികളും മൂന്ന് സമനിലകളുമാണ് കേരള ബ്ലാസ്റ്റേഴ്സിന്റെ ഇതുവരെയുള്ള സമ്പാദ്യം. ആകെ പതിനഞ്ച് പോയിന്റ്. ഐഎസ്എല്ലില് ആരെയും തടയാന് പ്രാപ്തിയുള്ള പ്രതിരോധമെന്നാണ് വെപ്പെങ്കിലും കഴിഞ്ഞ മത്സരത്തില് മുംബൈ സിറ്റി എഫ്സിയോട് നാണം കെട്ട തോല്വി വഴങ്ങിയത് കുറച്ചൊന്നുമല്ല ടീമിനെ വലയ്ക്കുന്നത്. അതുകൊണ്ട് തന്നെ സ്റ്റീവ് കോപ്പലും സംഘവും രണ്ടും കല്പ്പിച്ചാണ് കൊച്ചിയില് മത്സരത്തിനിറങ്ങുക.
ഈ സീസണില് പൂണെയില് ഇരു ടീമുകളും ഏറ്റുമുട്ടിയപ്പോള് ഓരോ ഗോള് വീതമടിച്ച് സമനിലയില് പിരിയുകയായിരുന്നു. കൊച്ചിയിലാണ് കളിയെന്നത് ബ്ലാസ്റ്റേഴ്സിന് പ്രതീക്ഷ നല്കുന്നുണ്ടെങ്കിലും പോയിന്റ് പട്ടികയില് നിലവില് കേരളത്തെക്കാള് മുന്നിലാണ് പൂനെ സിറ്റി. 12 കളികളില് അഞ്ചെണ്ണത്തില് തോല്വി വഴങ്ങിയ പൂനെയ്ക്കും ഇന്ന് ജയിച്ചേ പറ്റൂ. കഴിഞ്ഞ മത്സരത്തില് നോര്ത്ത് ഈസ്റ്റ് യുണൈറ്റഡിനോട് ഒരു ഗോളിന് തോറ്റാണ് പൂനെ കൊച്ചിയിലെത്തിയത്.
മികച്ച ഗോള് വ്യത്യാസത്തില് മത്സരത്തില് വിജയിക്കണമെങ്കില് കേരളത്തിന്റെ സികെ വിനീത് ഉള്പ്പെടെയുള്ള മുന്നേറ്റ നിര കുതിപ്പ് നടത്തിയേ തീരൂ.
