വിക്ടോറിയ സിറ്റി: ഹോങ്കോംഗ് ഓപ്പണ് സൂപ്പര് സീരീസ് ബാഡ്മിന്റണ് ടൂര്ണമെന്റില് ഇന്ത്യന് താരങ്ങളായ പി.വി സിന്ധുവും സമീര് വര്മയും ഫൈനലിലെത്തി. ആതിഥേയ താരം ച്യൂങ് നാന് യിയെ പരാജയപ്പെടുത്തിയാണ് സിന്ധു ഫൈനലില് കടന്നത്. സ്കോര് 21-14, 21-16.
കളിയുടെ തുടക്കത്തില് 4-2 എന്ന നിലയില് ച്യൂങ് മുന്നിലായിരുന്നുവെങ്കിലും സിന്ധു ക്രമേണ കളിയുടെ താളം വീണ്ടെടുത്തു. കടുത്ത പോരാട്ടത്തിന് ഒടുവിലായിരുന്നു രണ്ട് ഗെയിമുകളും സ്വന്തമാക്കി ഇന്ത്യന് താരം ഫൈനലിലെത്തിയത്. നേരത്തെ രണ്ട് തവണ സിന്ധു ച്യൂങ്ങിനെ പരാജയപ്പെടുത്തിയിരുന്നു. ഞായറാഴ്ച നടക്കുന്ന ഫൈനലില് തായ്വാന്റെ തായ് സൂ യിങ്ങിനെയാണ് സിന്ധു നേരിടുക.
ലോക ഒന്നാം നമ്പര് താരം കരോലിന മരിനെ തോല്പിച്ചാണ് തായ് സൂ യിങ് ഫൈനലിലെത്തിയത്. നിലവില് മൂന്നാം റാങ്കിലുളള തായ് സൂ യിങ് സീസണിലെ രണ്ടാം സൂപ്പര് സീരീസ് കിരീടം ലക്ഷ്യമിട്ടാണ് ഇറങ്ങുന്നത്. ജൂണില് ഇന്ഡോനേഷ്യ ഓപ്പണിലും തായ് സൂ യിങ് വിജയിച്ചിരുന്നു. ചൈന ഓപ്പണില് കിരീടം നേടിയതിന്റെ ആത്മവിശ്വാസത്തിലാണ് സിന്ധു ഹോങ്കോംഗിലും ഇറങ്ങുന്നത്.
മൂന്നാം സീഡ് ഡെന്മാര്ക്കിന്റെ യാന് ഒ യൊര്ഗേസനെ അട്ടിമറിച്ചാണ് സമീര് വര്മ കലാശപോരാട്ടത്തിന് യോഗ്യത നേടിയത്. സ്കോര് 21-19, 24-22. കരിയറില് ആദ്യമായാണ് സമീര് ഒരു സൂപ്പര് സീരിസ് ടൂര്ണമെന്റിന്റെ ഫൈനലില് എത്തുന്നത്.
