Sports

പിങ്ക് ചതിച്ചില്ല; ദക്ഷിണാഫ്രിക്കക്ക് ജയം

ജൊഹന്നാസ്ബര്‍ഗ്: പിങ്ക് ചതിക്കില്ലെന്ന് ഒരിക്കല്‍ കൂടി തെളിഞ്ഞു. തുടര്‍ച്ചയായ മൂന്നു തോല്‍വികള്‍ക്കു ശേഷം പിങ്ക് ജെഴ്‌സിയില്‍ കളിക്കാനിറങ്ങിയ ദക്ഷിണാഫ്രിക്കയ്ക്ക് മികച്ചജയം. മഴ മൂലം പുതുക്കി നിശ്ചയിച്ച 202 റണ്‍സ് വിജയലക്ഷ്യം 25.6 ഓവറില്‍ അഞ്ച് വിക്കറ്റ് നഷ്ടത്തില്‍ ദക്ഷിണാഫ്രിക്കന്‍ ടീം അനായാസം മറികടന്നു. ഡേവിഡ് മില്ലര്‍, ക്ലാസന്‍, ഫെലൂക്വായോ, ഡിവില്ലിയേഴ്‌സ് എന്നിവരുടെ പ്രകടനമാണ് ദക്ഷിണാഫ്രിക്കക്ക് അനായാസ വിജയം സമ്മാനിച്ചത്. ഇതോടെ പിങ്ക് ജേഴ്‌സിയില്‍ കളിച്ച മത്സരങ്ങളൊന്നും പരാജയപ്പെടാത്ത ടീം എന്ന ചരിത്രം ദക്ഷിണാഫ്രിക്ക നിലനിര്‍ത്തി.

ആദ്യം ബാറ്റ് ചെയ്ത ഇന്ത്യ 50 ഓവറില്‍ ഏഴ് വിക്കറ്റ് നഷ്ടത്തില്‍ 289 റണ്‍സെടുത്തിരുന്നു. ഇന്ത്യയ്ക്കു വേണ്ടി ശിഖര്‍ ധവാന്‍ സെഞ്ചുറിയും(109), നായകന്‍ വിരാട് കോലി അര്‍ദ്ധ സെഞ്ചുറിയും(75) നേടി. കരിയറിലെ നൂറാം ഏകദിനത്തിലാണ് ധവാന്‍ 13ാം സെഞ്ചുറി കരസ്ഥമാക്കിയത്.

290 റണ്‍സ് വിജയലക്ഷ്യം പിന്തുടര്‍ന്ന ദക്ഷിണാഫ്രിക്കന്‍ ടീമിന്റെ തുടക്കം മോശമായിരുന്നു. പിന്നീട് മഴ മൂലം വിജയലക്ഷ്യം 28 ഓവറില്‍ 202 റണ്‍സായി വെട്ടിച്ചുരുക്കി. പിന്നീടെത്തിയ താരങ്ങള്‍ ദക്ഷിണാഫ്രിക്കക്ക് ജയം സമ്മാനിക്കുകയായിരുന്നു. നാല് പന്തുകള്‍ ബാക്കി നില്‍ക്കെയായിരുന്നു ടീമിന്റെ ജയം. ദക്ഷിണാഫ്രിക്കന്‍ വിജയത്തില്‍ നിര്‍ണായകമായ റണ്‍സ് കൂട്ടിച്ചേര്‍ത്ത ക്ലാസനാണ് കളിയിലെ താരം. പരമ്പരയില്‍ ഇന്ത്യ 3-1 ന് മുന്നിലാണ്.

Shares 627
Close
Close