അണ്ടര്-19 ക്രിക്കറ്റ് ടീമിനെ നേതൃനിരയില് നിന്ന് നയിക്കാനും ലോകകപ്പ് എന്ന സ്വപ്ന ലക്ഷ്യത്തിലേക്ക് അവരെ നയിക്കുന്നതിലും രാഹുല് ദ്രാവിഡ് എന്ന കോച്ച് വഹിച്ച പങ്ക് ചെറുതല്ല. ബിസിസിഐയും ആ നേട്ടത്തെ ചെറുതായല്ല കണ്ടത്. അതുകൊണ്ടു തന്നെ സമ്മാനത്തുക പ്രഖ്യാപിച്ചപ്പോള് സഹപരിശീലകരെക്കാളും കളിക്കാരെക്കാളും പ്രാധാന്യം അവര് ദ്രാവിഡിന് നല്കി.
തനിക്ക് അമിത പ്രാധാന്യം നല്കിയ നിലപാടിനെതിരെ രംഗത്ത് വന്ന രാഹുല് നിലപാടില് ഉറച്ചു നിന്നതോടെ ടീമിലെ സഹ അംഗങ്ങളുടെയും സമ്മാനത്തുക ഉയര്ത്താന് തീരുമാനിച്ചിരിക്കുകയാണ് ബിസിസിഐ. ഇതോടെ ടീമിലെ എല്ലാ സപ്പോര്ട്ടിങ്ങ് സ്റ്റാഫിനും 25 ലക്ഷം രൂപ പാരിതോഷികമായി ലഭിക്കും. ദ്രാവിഡിന്റെ തുക 50ല് നിന്ന് 25 ലക്ഷമായി കുറക്കുകയും ചെയ്തു. കളിക്കാരുടെ പ്രതിഫലം 30 ലക്ഷമായി തുടരും.
കോച്ചായ രാഹുല് ദ്രാവിഡിന് 50 ലക്ഷം സമ്മാനത്തുക പ്രഖ്യാപിച്ച ബിസിസിഐ കുട്ടിത്താരങ്ങള്ക്ക് 30 ലക്ഷം വീതവും ടീമിലെ സ്റ്റാഫിനും സഹപരിശീലകര്ക്കും 20 ലക്ഷം വീതവും വീതമാണ് സമ്മാനത്തുക പ്രഖ്യാപിച്ചത്. എന്നാല് പാരിതോഷികത്തിന്റെ കാര്യത്തില് ബിസിസിഐ കാണിച്ച വിവേചനത്തിനെതിരെ ദ്രാവിഡ് രംഗത്ത് എത്തി. തനിക്ക് അമിത പ്രാധാന്യം നല്കിയെന്ന് പറഞ്ഞ രാഹുല് ടീമിലെ എല്ലാ അംഗങ്ങള്ക്കും സമ്മാനത്തുകയുടെ കാര്യത്തില് തുല്യപ്രാധാന്യം നല്കണമെന്ന് ആവശ്യപ്പെട്ടിരുന്നു.
കൂടെ ഉള്ളവരുടെ പിന്തുണ കൊണ്ടാണ് ടീമിന് മികച്ച രീതിയില് ശ്രദ്ധ നല്കാനായത്. എനിക്കൊപ്പം ഏഴു പേര് ഉണ്ടായിരുന്നു. ഞങ്ങള് 8 പേരും 14 മാസം ഒരുമിച്ചാണ് പ്രവര്ത്തിച്ചത്. എല്ലാവരുടെയും ശ്രമങ്ങള് എടുത്തു പറയേണ്ടതാണ്. അവരുടെ പ്രവര്ത്തനങ്ങളില് അഭിമാനമുണ്ടെന്നും ഞങ്ങളുടെ കുട്ടികളുടെ മികച്ച കളിക്കു വേണ്ടി എല്ലാവരും നല്ല രീതിയില് പ്രയത്നിച്ചെന്നും ദ്രാവിഡ് പറഞ്ഞിരുന്നു. അവരാണ് ടീമിന്റെ വിജയത്തിന് തന്നേക്കാള് ഏറെ അര്ഹതയുള്ളവരെന്നും രാഹുല് പറഞ്ഞിരുന്നു.
പൃഥ്വി ഷാ നയിച്ച അണ്ടര്-19 ടീം എതിരാളികളോട് ഒരു മത്സരത്തില് പോലും തോല്ക്കാതെയാണ് വിജയകിരീടം ചൂടിയത്. ഫൈനലില് ഓസ്ട്രേലിയയെ 8 വിക്കറ്റിനാണ് ഇവര് നിഷ്പ്രഭരാക്കിയത്. ടീമിലെ ഓരോ അംഗത്തിനും വിജയത്തില് പങ്കുണ്ടെന്ന് മത്സരശേഷവും രാഹുല് പറഞ്ഞിരുന്നു. 2015ലാണ് അണ്ടര്-19 ടീമിന്റെ കോച്ചായി ദ്രാവിഡ് ചുമതല ഏല്ക്കുന്നത്.