പാലക്കാട്: വാണിയംകുളം സ്വദേശികളായ ഒരേ കുടുംബത്തിലെ മൂന്ന് പേരെ നാല് ദിവസമായി കാണാതായതായി പരാതി. വാണിയംകുളം കൃഷ്ണകൃപ വീട്ടിൽ ബാബു ഭാസ്കർ (68), ഭാര്യ രമാദേവി (65), മകൻ വിഷ്ണു (32) എന്നിവരെയാണ് കാണാതായതായി ബന്ധുക്കൾ ഷൊർണൂർ പോലീസിൽ പരാതി നൽകിയത്. പരാതിയുടെ അടിസ്ഥാനത്തിൽ പോലീസ് കേസെടുത്ത് അന്വേഷണം ആരംഭിച്ചു.
വാണിയംകുളത്തെ ഇവരുടെ വീട് കഴിഞ്ഞ നാല് ദിവസമായി പൂട്ടിക്കിടക്കുകയാണ്. ഫോണിൽ ബന്ധപ്പെടാൻ സാധിക്കാതായതോടെയാണ് ബന്ധുക്കൾ അയൽവാസികളെ വിവരമറിയിച്ചത്. തുടർന്ന് നടത്തിയ പരിശോധനയിലാണ് വീട് അടഞ്ഞുകിടക്കുന്നതായി കണ്ടെത്തിയത്.
വ്യാഴാഴ്ച പുലർച്ചെ ഇവരുടെ പിക്കപ്പ് വാഹനം വീട്ടിൽ നിന്ന് പുറപ്പെടുന്നതിന്റെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. ഈ വാഹനത്തിൽ മൂന്നുപേരും യാത്ര ചെയ്തതായാണ് പ്രാഥമിക നിഗമനം. തുടർന്ന് ഇവരെക്കുറിച്ച് യാതൊരു വിവരവും ലഭിച്ചിട്ടില്ല.
മൂവരുടെയും മൊബൈൽ ഫോണുകൾ നിലവിൽ സ്വിച്ച് ഓഫ് നിലയിലാണ്. മൊബൈൽ ടവർ ലൊക്കേഷൻ പരിശോധിച്ചപ്പോൾ വീട് സ്ഥിതി ചെയ്യുന്ന പനയൂർ പ്രദേശം തന്നെയാണ് അവസാനമായി രേഖപ്പെടുത്തിയ ലൊക്കേഷനെന്ന് പോലീസ് അറിയിച്ചു.
സിസിടിവി ദൃശ്യങ്ങളും മറ്റ് സാങ്കേതിക തെളിവുകളും കേന്ദ്രീകരിച്ചാണ് ഷൊർണൂർ പോലീസ് അന്വേഷണം മുന്നോട്ടുകൊണ്ടുപോകുന്നത്. ഇവരുടെ വാഹനം സഞ്ചരിച്ച വഴി ഉൾപ്പെടെ വിവിധ സ്ഥലങ്ങളിലെ ക്യാമറ ദൃശ്യങ്ങളും പരിശോധിച്ചുവരികയാണ്.
അതേസമയം, കാണാതായ മൂന്നുപേരെയും കണ്ടെത്താൻ പൊതുജനങ്ങളുടെ സഹായവും കുടുംബം അഭ്യർഥിച്ചിട്ടുണ്ട്. ഇവരെക്കുറിച്ച് എന്തെങ്കിലും വിവരം ലഭിക്കുന്നവർ ഉടൻ ഷൊർണൂർ പോലീസുമായി ബന്ധപ്പെടണമെന്ന് അധികൃതർ അറിയിച്ചു.
