കോഴിക്കോട്: കോഴിക്കോട് നടക്കുന്ന ദേശീയ സീനിയര് വോളിബോള് ചാമ്പ്യന്ഷിപ്പില് കേരളത്തിന്റെ വനിത പുരുഷ ടീമുകള് ഫൈനലില്. ബുധനാഴ്ച ഉച്ചയ്ക്ക് ശേഷമാണ് ഫൈനല് മത്സരങ്ങള് നടക്കുന്നത്. ഉച്ചതിരിഞ്ഞ് മൂന്ന് മണിക്ക് വനിതകളുടെയും വൈകീട്ട് അഞ്ചിന് പുരുഷന്മാരുടേയും മത്സരം നടക്കും.
പുരുഷവിഭാഗത്തിലും, വനിതാ വിഭാഗത്തിലും കേരളത്തിന്റെ എതിരാളികള് റെയില്വേയാണ്. തുടര്ച്ചയായ പത്താം തവണയാണ് ദേശീയ സീനിയര് വനിതാ വിഭാഗം വോളിയുടെ ഫൈനലില് കേരളവും റെയില്വേസും ഏറ്റുമുട്ടുന്നത്. സെമിഫൈനലില് തമിഴ്നാടിനെ പരാജയപ്പെടുത്തിയാണ് കേരളത്തിന്റെ പുരുഷ വനിത ടീമുകള് ഫൈനലില് കടന്നത്.
നിലവിലെ ജേതാക്കളായ പുരുഷ ടീമിന് രണ്ടാമതും കിരീടം നേടുകയാണ് ലക്ഷ്യം. സെമി ഫൈനലില് ശക്തരായ തമിഴ്നാടിനെതിരെ ഇഞ്ചോടിഞ്ച് പോരാടിയാണ് കേരളം വിജയിച്ചത്. കഴിഞ്ഞ കളിയില് സര്വീസില് പത്തോളം പോയിന്റുകള് നഷ്ടമാക്കിയതിനാല് ഫൈനലില് ഏറെ ശ്രദ്ധാപൂര്വ്വമെ കേരളം ചുവടുവെക്കു എന്ന് ക്യാപ്റ്റന് ജെറോം വിനീത് വ്യക്തമാക്കി. വനിത ടീമും വലിയ വിജയപ്രതീക്ഷയിലാണുള്ളത്. ഫൈനലിനായി പ്രത്യേക പദ്ധതികള് തയാറാക്കിയെന്നും കിരീടത്തില് കുറഞ്ഞൊരു ലക്ഷ്യമില്ലെന്നും വനിത വിഭാഗം ക്യാപ്റ്റന് അഞ്ജു മോള് പറഞ്ഞു.
കേരളത്തിന്റെ ഇരു ടീമുകളും വിജയപ്രതീക്ഷ പങ്കുവെക്കുന്നുണ്ടെങ്കിലും റെയിവേയുടെ ടീമുകളും തീവ്രപരിശീലനത്തിലാണ്. കേരള ടീമുകളെ പരാജയപ്പെടുത്തി കിരീടം നേടുക എന്നതാണ് റെയില്വേയുടെ ലക്ഷ്യം.
