പ്രതിരോധ മന്ത്രാലയത്തിന്റെ കീഴില് രാജ്യത്തെ ആദ്യത്തെ ആദ്യ പ്രതിരോധ വ്യവസായ ഇടനാഴി തമിഴ്നാട്ടില് നിര്മിക്കുന്നു. ആയുധങ്ങളും സൈനിക ഉപകരണങ്ങളും നിര്മ്മിക്കുന്ന വ്യവസായങ്ങള് പ്രോത്സാഹിപ്പിക്കക എന്ന ലക്ഷ്യത്തോടെയാണ് ഇത് നിര്മിക്കുന്നത്. ക്വാഡ് അഥവാ ക്വാഡ്രിലാറ്ററല് ഇടനാഴി ചെന്നൈ, ഹൊസുര്, കോയമ്പത്തൂര്, സേലം, തിരുച്ചിറപ്പള്ളി എന്നീ നഗരങ്ങളെ ബന്ധിപ്പിച്ചുകൊണ്ടാണ് നിര്മിക്കുന്നത്.
പദ്ധതിയുടെ വിശാലമായ രൂപരേഖ പ്രതിരോധ മന്ത്രാലയത്തിന്റെ കീഴില് പൂര്ത്തീകരിക്കും. അതിനു ശേഷം ക്വാഡ് സംബന്ധിച്ച് വിശദമായ പ്രോജക്ട് റിപ്പോര്ട്ട് തയ്യാറാക്കാന് മികച്ച ഒരു കണ്സള്ട്ടന്സി സ്ഥാപനത്തെ ഏല്പ്പിക്കുമെന്ന് മന്ത്രാലയം അറിയിച്ചു.
കോയമ്പത്തൂര്, സേലം, ചെന്നൈ, തിരുച്ചിറപ്പള്ളി എന്നീ സ്ഥലങ്ങളിലെ പ്രതിരോധ നിര്മാതാക്കളുമായി നിര്ദിഷ്ട ഇടനാഴിയെക്കുറിച്ച് അടുത്ത രണ്ടാഴ്ചക്കുള്ളില് ചര്ച്ച നടത്താനും തീരുമാനമായിട്ടുണ്ട്. ഹിന്ദുസ്ഥാന് എയ്റോനോട്ടിക്സ് ലിമിറ്റഡ്, ഭാരത് ഇലക്ട്രോണിക്സ് ലിമിറ്റഡ്, ഭാരത് എര്ത്ത് മൂവേഴ്സ് ലിമിറ്റഡ്, എന്നിവിടങ്ങളില് നിന്നുള്ളവരും പ്രതിരോധ മന്ത്രാലയത്തില് നിന്നുള്ളലരും ഇതില് പങ്കെടുക്കും.
ഫെബ്രുവരി 2ലെ ബഡ്ജറ്റ് പ്രസംഗത്തില് അരുണ് ജയ്റ്റ്ലി പ്രതിരോധ വ്യവസായ ഇടനാഴിയെ സംബന്ധിച്ച പ്രഖ്യാപനം നടത്തിയിരുന്നു. പ്രതിരോധ വ്യവസായം പ്രോത്സാഹിപ്പിക്കുന്നതിനായി രണ്ട് ഇടനാഴികള് നിര്മിക്കുന്നതിനെക്കുറിച്ചാണ് അന്ന് പ്രഖ്യാപിച്ചത്. ബുണ്ടേല്ഖണ്ഡ് മേഖലയിലാണ് രണ്ടാമത്തെ പ്രതിരോധ വ്യവസായ ഇടനാഴി നിര്മിക്കുന്നതെന്ന് പ്രധാനമന്ത്രി കഴിഞ്ഞ ദിവസം വ്യക്തമാക്കിയിരുന്നു. 20,000 കോടി രൂപയുടെ നിക്ഷേപം ഇവിടെ നടത്തുമെന്നും അദ്ദേഹം പറഞ്ഞു.
