ഈ വനിതാദിനത്തില് കോട്ടയം വടവാതൂരില് പ്രവര്ത്തിക്കുന്ന സ്നേഹക്കൂട് ഒന്ന് പരിചയപ്പെടാം. ഒപ്പം സ്നേഹക്കൂടിന്റെ നാഥയായ നിഷ എന്ന നല്ലമനസ്സിന്റെ ഉടമയെയും. വിശക്കുന്നവര്ക്ക് ഭക്ഷണം നല്കിക്കൊണ്ട് നിഷ ആരംഭിച്ച ജീവകാരുണ്യ പ്രവര്ത്തനം ഇന്ന് അനാഥ സ്ത്രീ ജന്മങ്ങളെ പരിചരിക്കുന്നതില് എത്തി നില്ക്കുകയാണ്.
ഏറ്റുമാനൂര് സ്വദേശിനിയായ നിഷ വര്ഷങ്ങളായി ജീവകാരുണ്യ പ്രവര്ത്തനരംഗത്ത് സജീവമാണ്. കോട്ടയം വടവാതൂരില് നിഷ ആരംഭിച്ച സ്നേഹക്കൂട്ടില് ഒന്പത് അമ്മമാരടക്കം പതിമൂന്ന് പേരാണ് ഇന്ന് അന്തേവാസികള്. ഉറ്റവരും ഉടയവരും ഉപേക്ഷിച്ചവര്ക്ക് നാഥയാണ് നിഷ. ഭര്ത്താവ് മരണപ്പെട്ട മാരിയമ്മക്കും, മക്കള് ഉപേക്ഷിച്ച അമ്മുവിനും ജോലി തേടി കേരളത്തില് എത്തിയ ആസാം സ്വദേശിനി പല്ലവിക്കുമൊക്കെ സ്നേഹക്കൂട് ഇന്ന് സ്വന്തം വീടാണ്. എല്ലാവരും കൂടുന്ന കൂട്ടുകുടുംബമാണ് സ്നേഹക്കൂട്.
വാടകക്ക് എടുത്ത വീട്ടിലാണ് നിഷ തന്റെ സ്നേഹക്കൂട് ഒരുക്കിയിരിക്കുന്നത്. സ്നേഹക്കൂടിന്റെ ചെലവുകള്ക്കായി പണം തികയാതെ വന്നതോടെയാണ് നിഷ ഭക്ഷണശാല ആരംഭിച്ചത്. രാവിലെ 10.30 മുതല് രാത്രി 10.30 വരെയാണ് ഭക്ഷണശാലയുടെ പ്രവര്ത്തനം. ഭക്ഷണശാലയില് നിന്ന് ലഭിക്കുന്ന പണം സ്നേഹക്കൂടിനായി മാത്രമാണ് വിനിയോഗിക്കുന്നത്. നാടന് ഭക്ഷണത്തിന്റെ രുചി ആവോളം ആസ്വദിക്കുന്നവര്ക്ക് സ്നേഹക്കൂടിന്റെ കാരുണ്യ പ്രവര്ത്തനങ്ങളില് പങ്കാളിയായതിന്റെ ആത്മസംതൃപ്തിയും ലഭിക്കും.
എറണാകുളത്തു ട്രാവല് ഏജന്സി നടത്തുകയാണ് നിഷയുടെ ഭര്ത്താവ്. രണ്ട് മക്കളും വിദ്യാര്ത്ഥികളാണ്.
