കേരളത്തിലെ സ്ത്രീ കരുത്തിന്റെ പ്രതീകമാണ് കടത്തനാടന് കളരി സംഘത്തിന്റെ മീനാക്ഷിയമ്മ ഗുരുക്കള്. 70 വര്ഷമായി കളരി മുറ്റത്തിന്റെ ജീവസും ഓജസുമായി പ്രവര്ത്തിക്കുകയാണ് ഈ അമ്മ. 7ാം വയസ്സില് ആരംഭിച്ച കളരി പരിശീലനം ഇന്ന് ഗുരുവെന്ന പദവിയില് തുടരുന്നുണ്ട്. വയസ് 77 ആയെങ്കിലും മെയ് വഴക്കത്തിനും കൈക്കരുത്തത്തിനും ഒരു കുറവും സംഭവിച്ചിട്ടില്ല. രാജ്യം പത്മശ്രീ നല്കിയാണ് മീനാക്ഷിയമ്മ എന്ന പെണ് കരുത്തിനെ ആദരിച്ചത്.
ഓരോ വ്യക്തിയും നിര്ബന്ധമായും അഭ്യസിച്ചിരിക്കേണ്ട ഒന്നാണ് കളരി എന്ന് അമ്മ വ്യക്തമാക്കുന്നു. സ്വയരക്ഷ പ്രദാനം ചെയ്യുന്നതാണ് കളരി. തന്റെ ശിഷ്യകള് അഭ്യാസം കഴിഞ്ഞു പാതിരാത്രിയിലും തനിച്ചാണ് തിരിച്ചു പോകുന്നതെന്ന് ആത്മാഭിമാനത്തോടെയാണ് ഈ അമ്മ പറയുന്നത്. കളരി ഒരു പാഠ്യവിഷയമാക്കി അഭ്യസിപ്പിക്കണമെന്നാണ് മീനാക്ഷിയമ്മ ആവശ്യപ്പെടുന്നത്.
പത്മശ്രീ നേട്ടത്തിന് ശേഷം കേരളത്തില് കളരി അക്കാദമി ആരംഭിക്കുമെന്ന് സംസ്ഥാന സര്ക്കാര് വാക്കു നല്കിയെങ്കിലും ഇത് വരെ അത് യാഥാര്ഥ്യമാവാത്തതിന്റെ പരിഭവവും മറച്ചുവയ്ക്കുന്നില്ല ഇവര്. പുരസ്കാരങ്ങളും വാഗ്ദാനലംഘനങ്ങളും ഒരു വശത്ത് നടക്കുമ്പോള് തന്റെ കര്മ്മരംഗത്ത് സജ്ജീവമായി തന്നെ തുടരുകയാണ് മീനാക്ഷിയമ്മ.