ദുബായ് : ഇന്ത്യയുടെ പ്രിയപ്പെട്ട കബഡി ഇനി ഗള്ഫിലും. യു എ ഇ യിലെ ആദ്യ കബഡി ടൂര്ണമെന്റ് – കബഡി മാസ്റ്റെഴ്സിനു ദുബായില് ഈ മാസം 22 നു തുടക്കമാകും.ദുബായ് സ്പോര്ട്സ് കൗണ്സിലിന്റെ സഹകരണത്തോടെ ഇന്റര്നാഷനല് കബഡി ഫെഡറേഷനും, സ്റ്റാര് ഇന്ത്യ പ്രൈവറ്റ് ലിമിറ്റഡും കൈ കോര്ത്താണ് യു എ ഇ യിലെ ആദ്യ കബഡി ടൂര്ണമെന്റ് ദുബായില് നടത്തുന്നത്.
ഈ മാസം 22 മുതല് 30 വരെ ദുബായ് അല് വാസല് സ്പോര്ട്സ് ക്ലബിലാണ് ഭാരതം ഉള്പ്പടെ 6 ടീമുകള് മാറ്റുരക്കുന കബഡി മാസ്റ്റേഴ്സ് ദുബായ് അരങ്ങേറുന്നത്. പാകിസ്ഥാൻ, കൊറിയ. ഇറാന്, അര്ജന്റീന, കെനിയ എന്നീ രാജ്യങ്ങളാണ് ഭാരതത്തിനു പുറമേ മത്സരത്തിനായി ദുബായില് എത്തുന്നത്.
22 നും, 25 നുമാണ് ബദ്ധവൈരികളായ ഇന്ത്യയും, പാകിസ്ഥാനും ഏറ്റുമുട്ടുക. എല്ലാ ദിവസവും വൈകിട്ട് ആറു മണിക്കാണ് മത്സരങ്ങള് ആരംഭിക്കുന്നത്. ദിവസവും രണ്ടു മത്സരങ്ങള് വീതം ഉണ്ടാവും. ഇന്ത്യ, പാകിസ്ഥാന്, കെനിയ എന്നീ രാജ്യങ്ങള് ഗ്രൂപ്പ് എ യിലും, ഇറാന്, കൊറിയ, അര്ജന്റീന എന്നിവര് ഗ്രൂപ്പ് ബി യിലുമായാണ് ആദ്യ ഘട്ട മത്സരത്തിനിറങ്ങുക. മത്സരങ്ങൾ കാണാനുള്ള പ്രവേശനം സൗജന്യമാണ്.
മുപ്പതോളം വിവിധ സ്പോര്ട്സ് ഫെഡറേഷനുകള്ക്ക് സാന്നിധ്യമുള്ള നഗരം എന്ന നിലക്കാണ് ദുബായെ കബഡി മാസ്റ്റേഴ്സ് മത്സരങ്ങള്ക്കായി തിരഞ്ഞെടുത്തത് എന്ന് ദുബായ് സ്പോര്ട്സ് കൗണ്സിലിലെ സ്പോര്ട്സ് ടൂറിസം വകുപ്പ് മാനേജര് ഖാസി അല് മദനി, പ്രൊ കബഡി ലീഗ് കമ്മിഷണറും, മാഷല് സ്പോര്ട്സ് എക്സിക്യൂടിവ് ഹെഡുമായ അനുപം ഗോസ്വാമി എന്നിവര് ദുബായില് നടത്തിയ വാര്ത്താ സമ്മേളനത്തില് പറഞ്ഞു. ഇന്ത്യന് ടീം ക്യാപ്ടന് അജയ് താക്കൂര്, കോച്ച് എല് ശ്രീനിവാസ റെഡ്ഡി എന്നിവരും വാര്ത്തസമ്മേളനത്തില് പങ്കെടുത്തു.