മോസ്കോ : ലോകകപ്പ് മത്സരങ്ങൾ പുരോഗമിക്കവേ ഫൈനൽ ലൈനപ്പിനെ പറ്റി പ്രവചിക്കാൻ പ്രമുഖരും പ്രവചനക്കാരുമെല്ലാം തിരക്ക് കൂട്ടുന്നതിനിടെ ഇംഗ്ളണ്ടിന്റെ എക്കാലത്തേയും മികച്ച താരങ്ങളിലൊരാളായ ഡെവിഡ് ബെക്കാമും മനസു തുറന്നു. ഫൈനലിൽ അർജന്റീനയും ഇംഗ്ളണ്ടും കളിക്കുമെന്നാണ് ബെക്കാമിന്റെ അഭിപ്രായം. ചൈനയിൽ നടന്ന ഒരു പരിപാടിക്കിടെയാണ് ബെക്കാം തന്റെ ആഗ്രഹം പങ്കുവച്ചത്.
ഒരു കാലത്ത് ഫുട്ബോൾ ആരാധകരെ തന്റെ വളഞ്ഞു തിരിഞ്ഞുള്ള കിടിലൻ ഫ്രീകിക്കുകളിലൂടെ ആവേശം കൊള്ളിച്ച ബെക്കാം ഇംഗ്ളണ്ടിന്റെ കളിയിൽ പ്രതീക്ഷ വയ്ക്കുന്നു. ടുണീഷ്യക്കെതിരെ 2-1 നായിരുന്നു ഇംഗ്ളണ്ടിന്റെ ജയം.
അർജന്റീനയും ഇംഗ്ളണ്ടും ഫൈനൽ കളിക്കുമെന്നാണ് എന്റെ വിശ്വാസം . ഫൈനലിൽ ഇംഗ്ളണ്ട് ജയിക്കുമെന്നും ഞാൻ കരുതുന്നു. അതു പക്ഷേ എന്റെ രാജ്യമായതു കൊണ്ടുള്ള പക്ഷപാത ചിന്തയായിരിക്കാം. എന്തായാലും ഞാനതാണ് ആഗ്രഹിക്കുന്നത് . ബെക്കാം പറഞ്ഞു. ആദ്യ കളിയിലെ ടീമിന്റെ പ്രകടനത്തിൽ താൻ സന്തുഷ്ടനാണെന്നും ബെക്കാം കൂട്ടിച്ചേർത്തു.
1966 ൽ വെംബ്ളിയിൽ ജർമനിയെ തോൽപ്പിച്ച് കപ്പ് നേടിയതിനു ശേഷം പിന്നീട് 2006 ലാണ് ഇംഗ്ളണ്ട് ക്വാർട്ടറിലെങ്കിലും എത്തിയത്. അന്ന് ഡേവിഡ് ബെക്കാമായിരുന്നു ഇംഗ്ളണ്ട് ക്യാപ്ടൻ.