വെംബ്ലി: ഇംഗ്ലീഷ് താരം വെയ്ൻ റൂണിക്ക് അന്താരാഷ്ട്ര ഫുട്ബോളിൽ വിടവാങ്ങൽ മത്സരത്തിന് കളമൊരുങ്ങുന്നു. വെംബ്ലിയിൽ നാളെ രാത്രി നടക്കുന്ന ഇംഗ്ലണ്ട് – അമേരിക്ക സൗഹൃദ മത്സരത്തിലാണ് റൂണിക്ക് അവസാനമായി രാജ്യത്തിന്‍റെ കുപ്പായമണിയാൻ അധികൃതർ അവസരമൊരുക്കുന്നത്.
ഇന്ത്യൻ സമയം നാളെ രാത്രി 1.30നാണ് മത്സരം. 2016 നവംബർ 11 ന് സ്കോട്‍ലൻഡിനെ 3-0ന് തോൽപ്പിച്ച മത്സരത്തിന് ശേഷം റൂണി രാജ്യാന്തര മത്സരം കളിച്ചിട്ടില്ല. മത്സരത്തിന്‍റെ 90 മിനിറ്റും റൂണി കളിക്കില്ലെന്ന് ഇംഗ്ലീഷ് പരിശീലകന്‍ ഗാരെത് സൗത്ത്ഗേറ്റ് വ്യക്തമാക്കിയിട്ടുണ്ട്. റൂണി ഫൗണ്ടേഷന്‍റെ ജീവകാരുണ്യപ്രവര്‍ത്തനങ്ങള്‍ക്കായി കൂടിയാണ് മത്സരം.
2003 ൽ ദേശീയ സീനിയർ ടീമിൽ അരങ്ങേറ്റം കുറിച്ച റൂണി ഇംഗ്ലണ്ടിനെ പ്രതിനിധീകരിക്കുന്ന ഏറ്റവും പ്രായം കുറഞ്ഞ കളിക്കാരനായി. പിന്നീട് തിയോ വാൽക്കോട്ട് ഈ റെക്കോർഡ്‌ തിരുത്തി. ഇംഗ്ലണ്ടിനു വേണ്ടി ഏറ്റവുമധികം ഗോളുകൾ നേടിയിട്ടുള്ള റൂണി 119 അന്താരാഷ്ട്ര മത്സരങ്ങളിൽ നിന്നും 53 ഗോളുകൾ നേടിയിട്ടുണ്ട്.
2002 ൽ എവർട്ടൻ ഫുട്ബോൾ ടീമിന് വേണ്ടി കളിച്ച റൂണിയെ 2004 ൽ മുൻനിര ടീമായ മാഞ്ചെസ്റ്റർ യുണൈറ്റെഡ് തങ്ങളുടെ പാളയത്തിലെത്തിച്ചു. അന്നുമുതൽ ടീമിന്റെ വിജയങ്ങളിൽ റൂണി നിർണായക പങ്കു വഹിച്ചു.
