ദുബായ്: അന്താരാഷ്‌ട്ര ട്വന്റി 20 റാങ്കിംഗിൽ ഇന്ത്യൻ സ്പിന്നർ കുൽദീപ് യാദവിന് നേട്ടം. 20 സ്ഥാനങ്ങളിൽ പിന്നിട്ട് കുൽദീപ് മൂന്നാം സ്ഥാനത്തെത്തി. ഓസ്ട്രേലിയയ്‌ക്കെതിരായ പരമ്പരയിലെ മികച്ച പ്രകടനമാണ് കുൽദീപിന്റെ സ്ഥാനക്കയറ്റത്തിന് കരുത്തേകിയത്.
793 പോയിന്റുമായി അഫ്ഗാനിസ്ഥാനത്തിന്റെ റാഷിദ് ഖാനാണ് ഒന്നാം സ്ഥാനത്ത്. 752 പോയിന്റുമായി പാകിസ്താന്റെ ഷതബ് ഖാനാണ് രണ്ടാം സ്ഥാനത്ത്. മൂന്നാം സ്ഥാനത്തുള്ള കുൽദീപിന് 714 പോയിന്റാണുള്ളത്.
പതിനൊന്നാം സ്ഥാനത്തുള്ള യുസ്വേന്ദ്ര ചാഹലാണ് പട്ടികയിലുള്ള രണ്ടാമത്തെ ഇന്ത്യക്കാരൻ. ഭുവനേശ്വർ കുമാർ 20–ാം സ്ഥാനത്തും ജസ്പ്രീത് ബുമ്ര 21–ാം സ്ഥാനത്തുമാണ്. ബോളർമാരിലെ ആദ്യ പത്തു സ്ഥാനങ്ങളിൽ പേസ് ബോളറായി പാകിസ്ഥാൻ താരം ഫഹീം അഷ്റഫ് മാത്രമാണുള്ളത്.
ബാറ്റ്സ്മാൻമാരുടെ പട്ടികയിൽ ആറാം സ്ഥാനം നിലനിർത്തിയ ലോകേഷ് രാഹുലാണ് ഇന്ത്യൻ താരങ്ങളൽ മുന്നിലുള്ളത്. ഒൻപതാം സ്ഥാനത്തുള്ള രോഹിത് ശർമ്മയാണ് ആദ്യ പത്തിലുള്ള മറ്റൊരു ഇന്ത്യക്കാരൻ. നായകൻ വിരാട് കോഹ്ലി പതിനാലാം സ്ഥാനം നിലനിർത്തി.
