കൊളംബോ: ലസിംത് മലിംഗയെ ശ്രീലങ്കൻ ക്രിക്കറ്റ് ടീമിന്റെ നായകനായി നിയമിച്ചു. ഏകദിന, ടി20 ടീമുകളുടെ നായകനായാണ് നിയമിച്ചത്. നിരോഷൻ ദിക്കവെല്ലയായെ ഉപനായകനായും നിയമിച്ചിട്ടുണ്ട്. ന്യൂസിലൻഡിനെതിരായ പരമ്പരയ്ക്ക് മലിംഗയുടെ നേതൃത്വത്തിലാകും ലങ്ക ഇറങ്ങുന്നത്.
അന്താരാഷ്ട്ര ക്രിക്കറ്റിൽ ഒരുവർഷത്തോളം പുറത്തുനിന്ന മലിംഗ ഏഷ്യാ കപ്പിലാണ് ടീമിലേക്ക് തിരിച്ചെത്തിയത്. തുടർന്നാണിപ്പോൾ നായകസ്ഥാനത്തേക്കെത്തുന്നത്. ഫിറ്റ്നസ് പ്രശ്നത്തിന്റെ പേരിൽ ടീമിൽ നിന്ന് ഒഴിവാക്കിയിരുന്ന മുൻ നായകൻ മാത്യൂസ് കിവീസിനെതിരായ പരമ്പരയിൽ തിരിച്ചെത്തും.
നേരത്തെ ദിനേഷ് ചാണ്ഡിമലായിരുന്നു ഏകദിന ടീമിന്റ ക്യാപ്റ്റൻ. ടി20യിൽ തിസാര പെരേരയും. ഏഷ്യാ കപ്പിലെ തോൽവിക്ക് പിന്നാലെ ഏഞ്ചലോ മാത്യൂസിനെ നായക സ്ഥാനത്ത് നിന്ന് നീക്കിയിരുന്നു.
