കാര്യവട്ടം: അനൗദ്യോഗിക ഏകദിന പരമ്പരയിലെ രണ്ടാം മത്സരത്തിൽ ഇംഗ്ലണ്ട് ലയൺസിന് എതിരെ ഇന്ത്യ എ യ്ക്ക് 138 റൺസിന്റെ തകർപ്പൻ ജയം. 304 റൺസ് വിജയലക്ഷ്യം പിന്തുടർന്ന ഇംഗ്ലണ്ട് ലയൺസ് 165 റൺസിന് പുറത്തായി. മൂന്ന് വിക്കറ്റെടുത്ത മായങ്ക് മാർക്കണ്ടെയും രണ്ട് വീതം വിക്കറ്റെടുത്ത ഷാർദ്ദൂൽ ഠാക്കുറും അക്ഷർ പട്ടേലുമാണ് ലയൺസ് ബാറ്റിംഗ് നിരയെ തകർത്തത്.
48 റൺസ് എടുത്ത അലക്സ് ഡേവിസാണ് ഇംഗ്ലണ്ടിന്റെ ടോപ് സ്കോറർ. സാം ബില്ലിംഗ്സ് 12 റൺസിന് പുറത്തായി.
ആദ്യം ബാറ്റ് ചെയ്ത ഇന്ത്യ എ 50 ഓവറിൽ ആറ് വിക്കറ്റ് നഷ്ടത്തിലാണ് 303 റൺസെടുത്തത്. ഹനുമാ വിഹാരി 92 ഉം അജിങ്ക്യ രഹാനെ 91 ഉം റൺസെടുത്തു. പരമ്പരയിലെ ആദ്യ മത്സരത്തിൽ ഇന്ത്യ എ മൂന്ന് വിക്കറ്റിന് ജയിച്ചിരുന്നു.