IndiaEntertainment

ഓണ്‍ലൈന്‍ ഓര്‍ഡറുകളില്‍ മേല്‍ക്കോയ്മ ബിരിയാണിക്ക്

ബിരിയാണിയെ തോല്‍പ്പിക്കാനാകില്ല… ഒരിക്കലും… ഇത് തെളിയിച്ചു കൊണ്ട് ഓണ്‍ലൈനില്‍ ബിരിയാണി ഓര്‍ഡര്‍ ചെയ്യുന്നവരുടെ എണ്ണം ദിനം പ്രതി വര്‍ദ്ധിക്കുകയാണ്. ഒരിക്കല്‍ പിത്‌സയും ബര്‍ഗറും വാണിരുന്ന ഓണ്‍ലൈന്‍ ഭക്ഷണ വിപണി ഇപ്പോള്‍ കൈയടക്കിയിരിക്കുന്നത് ബിരിയാണിയാണ്.

2017 വര്‍ഷത്തെ അപേക്ഷിച്ച് ബിരിയാണിയുടെ ആവശ്യക്കാരില്‍ വന്‍ വര്‍ദ്ധനവാണ് ഉണ്ടായിരിക്കുന്നതെന്ന് ഓണ്‍ലൈന്‍ ഭക്ഷണ വിപണനരംഗത്തെ ഭീമന്‍മാരായ സ്വിഗ്ഗി അവകാശപ്പെടുന്നു. മുമ്പ് ഉത്സവ സീസണിലാണ് ബിരിയാണിക്ക് ആവശ്യക്കാര്‍ ഏറെയുണ്ടായിരുന്നത്.എന്നാല്‍ ഇപ്പോള്‍ ഓരോ 3.5 സെക്കന്‍ഡിലും ഒരു ബിരിയാണി ഓര്‍ഡര്‍ ഉണ്ടാകുന്നുണ്ടെന്നും സ്വിഗ്ഗി വെളിപ്പെടുത്തുന്നു.
പത്തിലധികം വ്യത്യസ്ത രുചികളിലാണ് ഇന്ത്യയില്‍ ബിരിയാണി ലഭ്യമാകുന്നത്. ഹൈദരബാദി, ലഖ്‌നൗവി, കൊല്‍ക്കത്ത, മലബാരി, ബോംബൈ തുടങ്ങി വിവിധ രുചികളില്‍ ബിരിയാണികള്‍ ലഭ്യമാണ്. വിശപ്പിന്റെ വിളി ശമിപ്പിക്കുകയെന്ന ഉദ്ദേശത്തിനപ്പുറം നാവിന്റെ രുചി മുകുളങ്ങള്‍ക്ക് പുതിയ രുചി ഭേദങ്ങള്‍ നല്‍കുകയെന്നത് കൂടി ഇപ്പോള്‍ ജനങ്ങള്‍ പരിഗണിക്കുന്നുണ്ട്.

ഓരോ പ്രദേശത്തെ ആള്‍ക്കാര്‍ക്കും പ്രാദേശികമായി ലഭിക്കുന്ന ബിരിയാണിക്കാകും പ്രിയം കൂടുതലെങ്കിലും രാജ്യത്തിന്റെ ബിരിയാണി തലസ്ഥാനമെന്ന് അറിയപ്പെടുന്നത് ഹൈദരാബാദ് തന്നെയാണ്. ഇനി ബിരിയാണിയുടെ വകഭേദങ്ങളില്‍ തന്നെ ആവശ്യക്കാരേറെ ചിക്കന്‍ ബിരിയാണിക്കാണ്.

അതിനിടെ, ബിരായാണിയുടെ ആരാധനയുടെ വ്യാപ്തി വിളിച്ചോതി ഇന്ത്യയില്‍ ഒക്ടോബര്‍ 28 ബിരിയാണി ദിനമായി ആചരിക്കാനും തുടങ്ങിയിരിക്കുന്നു. ഓണ്‍ലൈനില്‍ ഏറ്റവും കൂടുതല്‍ ബിരിയാണി ഓര്‍ഡര്‍ ലഭിച്ച ദിനമെന്ന പരിഗണനയിലാണത്രേ ബിരിയാണി ദിനം പ്രഖ്യാപിച്ചത്.

അതേസമയം, ബിരിയാണിയുടെ വര്‍ദ്ധിച്ചു വരുന്ന ആവശ്യകത പരിഗണിച്ച് നിരവധി വ്യവസായ ശൃംഖലകളാണ് ഈ രംഗത്തേയ്ക്ക് ആകര്‍ഷിക്കപ്പെട്ടിരിക്കുന്നത്. ലാഭസാദ്ധ്യത മുതലെടുത്ത് ഭക്ഷണ വിപണന രംഗത്തെ ഭീമന്‍മാര്‍ നിക്ഷേപങ്ങളുമായി ബിരിയാണി വിപണി ലാക്കാക്കി വട്ടമിട്ട് പറക്കുന്നുണ്ട്.

601 Shares

Please scroll down for comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close