ന്യൂഡൽഹി: 8000 ക്ലബ്ബിൽ ഇടം പിടിച്ച് ഇന്ത്യയുടെ വെടിക്കെട്ട് ബാറ്റ്സ്മാൻ രോഹിത് ശർമ്മ. ഓസ്ട്രേലിയയ്‌ക്കെതിരായ അഞ്ചാമത്തെയും അവസാനത്തെയും ഏകദിനത്തിൽ 43 റൺസ് നേടിയതോടെയാണ് രോഹിത് സുവർണ്ണ നേട്ടത്തിനർഹനായത്. 8000 ക്ലബ്ബിലെത്തുന്ന ഒൻപതാമത്തെ ഇന്ത്യൻ താരമാണ് രോഹിത് ശർമ്മ.
ഏകദിന ക്രിക്കറ്റിൽ ഏറ്റവും വേഗത്തിൽ 8000 റൺസ് പൂർത്തിയാക്കുന്ന മൂന്നാമത്തെ താരം കൂടിയാണ് രോഹിത്. മുൻ ഇന്ത്യൻ നായകൻ സൗരവ് ഗാംഗുലിയ്‌ക്കൊപ്പമാണ് രോഹിത് നേട്ടം പങ്കുവെക്കുന്നത്. 200-ാം ഇന്നിംഗ്സിലാണ് ഇരുവരും 8000 ക്ലബ്ബിലെത്തിയത്.
ഏകദിനത്തിലെ ഏറ്റവും ഉയർന്ന വ്യക്തിഗത സ്കോറും ഏറ്റവും കൂടുതൽ ഇരട്ട സെഞ്ച്വറി നേടിയതിന്റെ റെക്കോർഡും രോഹിത്തിന്റെ പേരിലാണുള്ളത്. ഏറ്റവും ഉയർന്ന സ്കോറായ 264 അടക്കം മൂന്ന് ഇരട്ട സെഞ്ചവറിയാണ് രോഹിത് ഇതിനോടകം നേടിയത്.
175 ഇന്നിംഗ്സുകളിൽ നിന്ന് 8000 റൺസ് നേടിയ ഇന്ത്യൻ നായകൻ വിരാട് കോഹ് ലിയാണ് പട്ടികയിൽ മുന്നിൽ. 182 ഇന്നിംഗ്സിൽ നിന്ന് നേട്ടം കൈവരിച്ച ദക്ഷിണാഫ്രിക്കൻ താരം എബി ഡിവില്ലിയേഴ്സാണ് പട്ടികയിൽ രണ്ടാമതുള്ളത്.
സച്ചിൻ ടെൻഡുൽക്കർ, രാഹുൽ ദ്രാവിഡ്, വിരേന്ദർ സെവാഗ്, യുവരാജ് സിംഗ്, മുഹമ്മദ് അസ്ഹറുദീൻ, എം.എസ്. ധോണി എന്നിവരാണ് 8000 ക്ലബ്ബിലെത്തിയ മറ്റ് ഇന്ത്യൻ താരങ്ങൾ.
