കേപ്ടൗൺ: വരുന്ന ലോകകപ്പോടെ ഏകദിനക്രിക്കറ്റിൽ നിന്ന് വിരമിക്കുമെന്ന് പ്രഖ്യാപിച്ച് ദക്ഷിണാഫ്രിക്കൻ ഓൾ റൗണ്ടർ ജീൻ പോൾ ഡുമിനി.
2004ൽ അന്താരാഷ്ട ക്രിക്കറ്റിൽ അരങ്ങേറ്റം കുറിച്ച മുപ്പത്തിനാലുകാരനായ ഡുമിനിയുടെ മൂന്നമത് ലോകകപ്പാണ് മെയ് മുപ്പതിന് ഇംഗ്ലണ്ടിലും വെയിൽസിലുമായി ആരംഭിക്കുന്നത്. ടെസ്റ്റിൽ നിന്നും ഫസ്റ്റ്ക്ലാസ് ക്രിക്കറ്റിൽ നിന്നും നേരത്തെ തന്നെ വിരമിച്ച ഡുമിനി ട്വെന്റി-20യിൽ തുടർന്നും കളിക്കുമെന്ന് അറിയിച്ചു.
ദക്ഷിണാഫ്രിക്കയ്‌ക്കായി 193 ഏകദിനങ്ങൾ കളിച്ച ഇടംകൈയ്യൻ ബാറ്റ്സ്മാനായ ഡുമിനി 37.39 ശരാശരിയിൽ 5047 റൺസ് സ്കോർ ചെയ്തിട്ടുണ്ട്. 45.08 ശരാശരിയിൽ 68 വിക്കറ്റുകളും ഡുമിനി നേടിയിട്ടുണ്ട്.
നേരത്തെ വെസ്റ്റ് ഇൻഡീസ് ഇതിഹാസ താരം ക്രിസ് ഗെയിലും ദക്ഷിണാഫ്രിക്കൻ സ്പിന്നർ ഇമ്രാൻ താഹിറും ഇത് തങ്ങളുടെ അവസാന ഏകദിന ലോകകപ്പായിരിക്കുമെന്ന് പ്രഖ്യാപിച്ചിരുന്നു.
