മിഥുൻ മാനുവൽ തോമസ് സംവിധാനം നിർവഹിച്ച ‘അർജന്റീന ഫാൻസ് കാട്ടൂർക്കടവ്’ ഈ വെള്ളിയാഴ്ച തീയേറ്ററുകളിൽ റിലീസിന് ഒരുങ്ങുമ്പോൾ അണിയറപ്രവർത്തകർ അർജന്റീന ഫുട്ബോൾ താരം ലയണൽ മെസ്സിയ്ക്കായി ഒരു ട്രിബ്യുട്ട് വീഡിയോ പുറത്തിറക്കിയിരിക്കുകയാണ്. വീഡിയോ ഇപ്പോൾ യൂട്യൂബിന്റെ ട്രെൻഡിങ് ലിസ്റ്റിൽ ഒന്നാമതാണ്.
സിനിമയുടെ ചില ഭാഗങ്ങളും ലയണൽ മെസ്സിയുടെ ഫുട്ബോൾ പ്രകടനങ്ങളും കോർത്തിണക്കി കൊണ്ട് ഹരം നൽകുന്നതാണ് വീഡിയോ. ഗോപി സുന്ദറിന്റെ ഗാനം ദൃശ്യങ്ങൾക്കനുയോജ്യമായി ചേർന്ന് നിൽക്കുന്നു. “അന്നേയ്ക്കും ഇന്നേയ്ക്കും അവസാന ശ്വാസം വരേയും.. വാമോസ് അര്ജന്റീന!” എന്ന കാളിദാസ് ജയറാമിന്റെ വോയിസ് ഓവറും കേള്ക്കാം.
അശോകൻ ചരുവിലിന്റെ കഥയിൽ ജോൺ മന്ത്രിക്കലും മിഥുൻ മാനുവൽ തോമസും ചേർന്നാണ് ഈ കാളിദാസ് ജയറാം – ഐശ്വര്യ ലക്ഷ്മി ചിത്രത്തിന്റെ തിരക്കഥ ഒരുക്കിയിരിക്കുന്നത്. ഛായാഗ്രഹണം രണദിവെയും ചിത്രസംയോജനം ലിജോ പോളും നിർവഹിച്ചിരിക്കുന്നു. മാർച്ച് 22ന് തീയേറ്ററുകളിൽ എത്തുന്ന ചിത്രം ആഷിക്ക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക്ക് ഉസ്മാനാണ് നിർമിച്ചിരിക്കുന്നത്.