കൊൽക്കത്ത: ഇന്ത്യൻ പ്രീമിയർ ലീഗ് ക്രിക്കറ്റിൽ സൺ റൈസേഴ്സ് ഹൈദരാബാദിനെതിരെ കൊൽക്കത്ത നൈറ്റ് റൈഡേഴ്സിന് 6 വിക്കറ്റ് ജയം. 182 റൺസ് വിജയലക്ഷ്യം പിൻതുടർന്ന കൊൽക്കത്ത രണ്ട് പന്തുകൾ ശേഷിക്കെ 4 വിക്കറ്റുകൾ നഷ്ടത്തിൽ കൊൽക്കത്ത മറികടന്നു.
68 റൺസെടുത്ത നിതീഷ് റാണയുടെയും 49 റൺസെടുത്ത ആന്ദ്രേ റസലിന്റെയും പ്രകടനമാണ് കൊൽക്കത്തക്കയ്ക്ക് വിജയം സമ്മാനിച്ചത്. റോബിൻ ഉത്തപ്പ 35 റൺസെടുത്തപ്പോൾ നായകൻ ദിനേശ് കാർത്തിക്കിന് രണ്ട് റൺസെടുക്കാനേ കഴിഞ്ഞുള്ളൂ.
നേരത്തെ ടോസ് നഷ്ടപ്പെട്ട് ആദ്യം ബാറ്റ് ചെയ്ത ഹൈദരാബാദ് മൂന്ന് വിക്കറ്റ് നഷ്ടത്തിലാണ് 181 റൺസ് എടുത്തത്. തകർപ്പൻ അർദ്ധ സെഞ്ചുറിയുമായി ഐപിഎല്ലിലേക്കുള്ള മടങ്ങിവരവ് ഡേവിഡ് വാർണർ ആഘോഷമാക്കി. വാർണർ 53 പന്തിൽ 85 റൺസ് എടുത്ത് പുറത്തായി. വിജയ് ശങ്കർ പുറത്താകാതെ 40 ഉം ജോണി ബെയർസ്റ്റോ 39 ഉം റൺസ് എടുത്തു.