മൊഹാലി: ഐപിഎല്ലിൽ കിംഗ്സ് ഇലവൺ പഞ്ചാബിന് രണ്ടാം ജയം. കരുത്തരായ മുംബൈ ഇന്ത്യൻസിനെ എട്ട് വിക്കറ്റിനാണ് പഞ്ചാബ് തകർത്തത്. 177 റൺസ് വിജയലക്ഷ്യവുമായി ഇറങ്ങിയ പഞ്ചാബ് 8 പന്ത് ശേഷിക്കെ രണ്ട് വിക്കറ്റ് നഷ്ടത്തിലാണ് ലക്ഷ്യം മറികടന്നത്. ക്രിസ് ഗെയ് ലിന്റെയും ലോകേഷ് രാഹുലിന്റെയും വെടിക്കെട്ട് ബാറ്റിംഗാണ് പഞ്ചാബിന് അനായാസ ജയം സമ്മാനിച്ചത്.
24 പന്തിൽ 40 റൺസുമായി ഗെയ് ലും 21 പന്തിൽ 43 റൺസുമായി മായംഗ് അഗർവാളും പുറത്തായി. ക്രുണാൽ പാണ്ഡ്യയാണ് ഇരുവരെയും പുറത്താക്കിയത്. 51 പന്തിൽ 71 റൺസുമായി ലോകേഷ് രാഹുൽ പുറത്താകാതെ നിന്നു.
നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ മുംബൈ നിശ്ചിത 20 ഓവറിൽ 7 വിക്കറ്റ് നഷ്ടത്തിലാണ് 176 റൺസെടുത്തത്. 39 പന്തിൽ 60 റൺസെടുത്ത ക്വിന്റൺ ഡി കോക്കിന്റെ പ്രകടനമാണ് മുംബൈ ഇന്നിംഗ്സിന് അടിത്തറ പാകിയത്. നായകൻ രോഹിത് ശർമ്മ 18 പന്തിൽ 32 റൺസും ഹർദ്ദിക് പാണ്ഡ്യ 19 പന്തിൽ 31 റൺസും നേടി.
