ഹൈദരാബാദ്: ഇന്ത്യന്‍ പ്രിമിയര്‍ ലീഗ് ക്രിക്കറ്റില്‍ അല്‍സാരി ഷെഹീം ജോസഫ് എന്ന വിന്‍ഡീസ് പേസ് ബൗളറുടെ റെക്കോഡ് പ്രകടനത്തിന്റെ പിന്‍ബലത്തില്‍ മുംബൈ ഇന്ത്യന്‍സിന് ഉജ്ജ്വല ജയം. സണ്‍റൈസേഴ്‌സ് ഹൈദരാബാദിനെ 40 റണ്‍സിനാണ് മുംബൈ തകര്‍ത്തത്.
137 റണ്‍സ് വിജയലക്ഷ്യവുമായി ബാറ്‌റിംഗിനിറങ്ങിയ സണ്‍റൈസേഴ്‌സ് 17.4 ഓവറില്‍ 96 റണ്‍സിന് തകര്‍ന്നടിഞ്ഞു. ഐപിഎല്‍ അരങ്ങേറ്റം കുറിച്ച ജോസഫ് 12 റണ്‍സ് വഴങ്ങി ആറ് വിക്കറ്റ് വീഴ്‌ത്തിയപ്പോള്‍ ഐപിഎല്ലിലെ ഏറ്റവും മികച്ച പ്രകടനത്തിന്റെ റെക്കോഡ് പഴങ്കഥയായി. 14 റണ്‍സ് വഴങ്ങി ആറ് വിക്കറ്റ് വീഴ്‌ത്തിയ സൊഹൈല്‍ തന്‍വീറിന്റെ റെക്കോഡാണ് തകര്‍ന്നത്. ആദ്യം ബാറ്റ് ചെയ്ത മുംബൈ നിശ്ചിത 20 ഓവറില്‍ ഏഴ് വിക്കറ്റ് നഷ്ടത്തിലാണ് 136 റണ്‍സ് നേടിയത്. 26 പന്തില്‍ പുറത്താകാതെ 46 റണ്‍സെടുത്ത കീറോണ്‍ പൊള്ളാര്‍ഡാണ് ടോപ് സ്‌കോറര്‍. അവസാന രണ്ട് ഓവറില്‍ 39 റണ്‍സാണ് പൊള്ളാര്‍ഡ് സ്‌കോര്‍ ചെയ്തത്. അല്‍സാരി ജോസഫാണ് കളിയിലെ താരം.
