കൊല്ക്കത്ത: ആധുനിക കാലത്തെ ക്രിക്കറ്റ് ബാറ്റ്സ്മാന്മാരുടെ പറുദീസയായി മാറിക്കൊണ്ടിരിക്കുകയാണ്. കുട്ടിക്ക്രിക്കറ്റ് കളം പിടിച്ച ഇന്നത്തെ കാലത്ത് ഭൂരിഭാഗം കളികളുടേയും ഫലം നിര്ണ്ണയിക്കുന്നത് ബാറ്റ്സ്മാന്മാരുടെ പ്രകടനമാണ്. ഇന്നലെ നടന്ന റോയല് ചാലഞ്ചേഴ്സ് ബാംഗ്ലൂര്-കൊല്ക്കത്ത നൈറ്റ് റൈഡേഴ്സ് മത്സരത്തിലെ രംഗങ്ങള് ഇതിന് ഉദാഹരണമാണ്.
മത്സരത്തിന്റെ 16-ാം ഓവറിലാണ് സംഭവം. കുല്ദീപ് യാദവ് എറിഞ്ഞ ഈ ഓവറില് ‘സ്ട്രൈക്ക്’ ചെയ്തത് ഇംഗ്ലീഷ് താരം മൊയീന് അലി. നോണ് സ്ട്രൈക്കര് എന്ഡില് ക്യാപ്റ്റന് വിരാട് കോഹ്ലി. ആദ്യ പന്ത് തന്നെ കവറിലൂടെ ബൗണ്ടറി കടന്നു.രണ്ടാം പന്ത് സിക്സര് പറത്തി മൊയീന് അലി അര്ദ്ധ സെഞ്ച്വറി പിന്നിട്ടു.
മൂന്നാം പന്തും ലോങ്ങ് ഓണിലൂടെ ബൗണ്ടറി കടന്നതോടെ കുല്ദീപ് സമ്മര്ദ്ദത്തിലായി. അടുത്ത പന്ത് ലോങ്ങ് ഓണില് ഒരു ക്യാച്ചാണെന്ന് തോന്നലുണ്ടാക്കിയെങ്കിലും പ്രസാദ് കൃഷ്ണ മുന്നോട്ട് കയറി നിന്നതിനാല് പന്ത് അതിര്ത്തി കടന്നു. തുടര്ന്നുള്ള പന്ത് വൈഡായി.അഞ്ചാം പന്തും മൊയീന് അലി ഗ്യാലറിയിലെത്തിച്ചപ്പോഴേക്കും കുല്ദീപ് ആ ഓവറില് 27 റണ്സ് വിട്ടുകൊടുത്തു കഴിഞ്ഞിരുന്നു.അവസാന പന്തില് അലിയുടെ വിക്കറ്റ് നേടാനായെങ്കിലും താരം വളരെ നിരാശനായി കാണപ്പെട്ടിരുന്നു.
ഓവര് പൂര്ത്തിയാക്കി മടങ്ങുമ്പോള് തന്റെ തോപ്പി വലിച്ചെറിഞ്ഞ കുല്ദീപ് സ്ട്രാറ്റജിക് ടൈം ഔട്ടിലും ടീമിനോപ്പം ചേരാന് കൂട്ടാക്കിയില്ല. ടീമംഗങ്ങളും സപ്പോര്ട്ട് സ്റ്റാഫ് അംഗങ്ങളുമെത്തിയാണ് കുല്ദീപിനെ ആശ്വസിപ്പിച്ചത്.ലോകകപ്പ് മത്സരങ്ങള് പടിവാതില്ക്കലെത്തി നില്ക്കുമ്പോള് സീനിയര് താരങ്ങളും ജൂനിയര് താരങ്ങളും ഒരുപോലെ സമ്മര്ദ്ദത്തിലാകുന്നത് 2019 ഐപിഎല്ലിലെ സ്ഥിരം കാഴ്ചയായിരിക്കുകയാണ്. കളിയുടെ ദൈര്ഘ്യം കുറച്ച് ആവേശം കൂട്ടുമ്പോള് ഒരുപിടി മികച്ച ബോളര്മാരെയാണ് ക്രിക്കറ്റിന് നഷ്ടപ്പെടുന്നത് എന്നതാണ് വസ്തുത.
