മുംബൈ: ഇന്ത്യക്ക് ലോകകപ്പ് നേടാൻ മികച്ച സാദ്ധ്യതകളാണ് നിലവിലുള്ളതെന്ന് മുൻ ഇന്ത്യൻ താരം ദിലീപ് വെങ്സാർക്കർ. ഇന്ത്യ സെമിയിൽ പ്രവേശിക്കുമെന്ന കാര്യത്തിൽ ആർക്കും സംശയമുണ്ടാകില്ലെന്നും അദ്ദേഹം വ്യക്തമാക്കി.
‘നമുക്ക് ഇത്തവണ നല്ല പ്രതിഭാശേഷിയുണ്ട്. എല്ലാ കളിക്കാരും കഴിവുള്ളവരും മികച്ച ഫോമിലുള്ളവരുമാണ്. ഞാൻ അവർക്ക് എല്ലാ വിജയാശംസകളും നേരുന്നു.’ അദ്ദേഹം മാദ്ധ്യമങ്ങളോട് പറഞ്ഞു.
2006 മുതൽ 2008 വരെ ഇന്ത്യൻ ക്രിക്കറ്റ് ടീമിന്റെ സെലക്ഷൻ കമ്മിറ്റി ചെയർമാനായിരുന്നു വെങ്സാർക്കർ.
ഇന്ത്യയ്ക്കായി 116 ടെസ്റ്റ് മത്സരങ്ങൾ കളിച്ച വെങ്സാർക്കർ 6,868 റൺസ് നേടിയിട്ടുണ്ട്. 129 ഏകദിന മത്സരങ്ങളിലായി 3,508 റൺസും അദ്ദേഹം സ്കോർ ചെയ്തിട്ടുണ്ട്. സുനിൽ ഗവാസ്കർക്കും ഗുണ്ടപ്പ വിശ്വനാഥിനുമൊപ്പം ഇന്ത്യൻ മദ്ധ്യനിര അടക്കിവാണ ദിലീപ് വെങ്സാർക്കർ ‘സ്ട്രെയ്റ്റ് ഡ്രൈവുകളുടെ രാജാവ്’ എന്നറിയപ്പെട്ടിരുന്നു.
