ആനമട: ആലത്തൂർ ലോക്സഭാ മണ്ഡലത്തിലെ സിപിഎം ഭരിക്കുന്ന നെല്ലിയാമ്പതി ഗ്രാമപഞ്ചായത്തിലെ ആനമട ബൂത്തിൽ എൽഡിഎഫ് സ്ഥാനാർത്ഥി പി കെ ബിജുവിന് ലഭിച്ചത് പൂജ്യം വോട്ട്. സംഭവത്തിൽ സിപിഎം സംസ്ഥാന കമ്മിറ്റി അടിയന്തിര റിപ്പോർട്ട് ആവശ്യപ്പെട്ടു.
നെല്ലിയാമ്പതിയിലെ രണ്ടാം വാർഡിലെ 138ആം നമ്പർ ബൂത്തായ ആനമടയിലാണ് പി കെ ബിജുവിന് ഒരു വോട്ട് പോലും ലഭിക്കാതിരുന്നത്. 92 വോട്ടർമാരുള്ള ഈ ബൂത്തിൽ 34 പേരാണ് വോട്ട് ചെയ്തത്. ഇതിൽ ഒരു വോട്ട് പോലും ബിജുവിന് ലഭിച്ചിരുന്നില്ല. സ്വതന്ത്ര സ്ഥാനാർത്ഥിയായ കൃഷ്ണൻകുട്ടിക്ക് വരെ രണ്ട് വോട്ട് ലഭിച്ചിരുന്നു.
ജയസാദ്ധ്യതയുള്ള സ്ഥാനാർത്ഥികളിൽ മുൻപന്തിയിൽ സിപിഎം വിലയിരുത്തിയിരുന്ന പി കെ ബിജുവിന്റെ പരാജയം പാർട്ടി നേതൃത്വത്തിന് വലിയ നാണക്കേടാണ് സൃഷ്ടിച്ചിരിക്കുന്നത്. ഇവിടെ യുഡിഎഫിലെ രമ്യ ഹരിദാസ് അട്ടിമറി വിജയം നേടിയിരുന്നു. ഇതിന് പിന്നലെയാണ് ഭരണം കൈവശമിരിക്കുന്ന പഞ്ചായത്തിലെ ബൂത്തിൽ പ്രമുഖ സ്ഥാനാർത്ഥി സംപൂജ്യനായിരിക്കുന്നത്.
