ലാസ്വേഗാസ്: മാനഭംഗക്കേസ്സില് പ്രശസ്ത ഫുട്ബോള് താരം ക്രിസ്റ്റിയാനോ റൊണാള്ഡോയ്ക്ക് അമേരിക്കന് കോടതിയുടെ ക്ലീന് ചിറ്റ്. ലാസ്വേഗാസ് ഹോട്ടലില് വച്ച് 2009ല് കാതറിന് മയോര്ഗ എന്ന യുവതിയെ പോര്ച്ചുഗീസ് താരം മാനഭംഗപ്പെടുത്താന് ശ്രമിച്ചുവെന്നായിരുന്നു കേസ്സ്. ദ ക്ലാര്ക്ക് കൗണ്ടി ഡിസ്ട്രിക്ട് അറ്റോര്ണിയാണ് കേസ്സ് തള്ളിയത്.
കേസ്സ് നടക്കുന്നതിനിടെ പരാതിക്കാരി 2010ല് തന്നെ കോടതിയ്ക്ക് പുറത്തുവച്ച് തുടര്ച്ചയായി വിഷയം പരിഹരിക്കാനായി റൊണാള്ഡോയെ സമീപിച്ചിരുന്നതായി കോടതി കണ്ടെത്തിയിരുന്നു. പിന്നീട് നീണ്ട 8 വര്ഷങ്ങള്ക്ക് ശേഷമാണ് യുവതി വീണ്ടും കേസ്സ് കുത്തിപ്പൊക്കിയത്. പക്ഷെ തുടര്ച്ചയായിത്തന്നെ ആരോപണങ്ങള് റൊണാള്ഡോ നിഷേധിച്ചിരുന്നു. ‘എവിടെ വച്ച് ? ആരാണ് അക്രമി ? എന്നീ അടിസ്ഥാന ചോദ്യത്തിന് പോലും യുവതിയ്ക്ക് ഉത്തരമില്ലായിരുന്നു. ഇതിനെത്തുടര്ന്ന് പോലീസിന് ഫലപ്രദമായ അന്വേഷണം നടത്താനായില്ലെന്നും കോടതി വ്യക്തമാക്കി. 2018ലാണ് ലാസ്വേഗാസ് പോലീസ് കേസ്സ് അന്വേഷിച്ചത്.
ഡെര് സ്പൈജല് എന്ന ഒരു ജര്മ്മന് മാസികയാണ് ആദ്യമായി യുവതിയുടെ ആരോപണവുമായി രംഗത്തെത്തിയത്.റൊണാള്ഡോ മാഞ്ചസ്റ്റര് യുണൈറ്റഡിനു വേണ്ടി കളിക്കുന്ന കാലഘട്ടത്തിലാണ് പ്രസ്തുത ആരോപണം ഉയര്ന്നത്.യുവതിയുടെ വാദങ്ങള് നിലനില്ക്കുന്നതല്ല എന്നും മാനഭംഗം നടത്തി എന്നത് സംശയാതീതമായി തെളിയിക്കാന് വാദിഭാഗം അഭിഭാഷകര്ക്ക് സാധിച്ചിട്ടില്ലെന്നും ഇന്നലെ ലാസ് വേഗാസ് കോടതി നിരിക്ഷിച്ചു.
