ശ്രീനഗര്: അതിര്ത്തിയില് പാകിസ്ഥാന് പോസ്റ്റ് തകര്ത്ത് ഇന്ത്യന് സൈന്യം. ജമ്മു കശ്മീരിലെ രാജൗരിലെ നൗഷേര സെക്ടറില് പാക് സൈന്യം നടത്തിയ ഷെല്ലാക്രമണത്തിനും വെടിനിര്ത്തല് ലംഘനത്തിനും ഇന്ത്യന് സൈന്യം നടത്തിയ ശക്തമായ പ്രത്യാക്രമണത്തിലാണ് പാകിസ്ഥാന് പോസ്റ്റ് തകര്ന്നത്.
ഇന്ത്യന് സൈന്യത്തിന്റെ പ്രത്യാക്രമണത്തില് പാകിസ്ഥാന് പോസ്റ്റ് പൂര്ണ്ണമായും തകര്ന്നതായി കരസേന വൃത്തങ്ങള് അറിയിച്ചു. ഇന്ന് രജൗരിയിലെ നൗഷേര സെക്ടറില് പാകിസ്ഥാന് വെടിനിര്ത്തല് കരാര് ലംഘിച്ചതായും ഒരു ഇന്ത്യന് സൈനികന് വീരമൃത്യു വരിച്ചതായും സൈനിക വൃത്തങ്ങള് അറിയിച്ചിരുന്നു. തുടര്ന്നായിരുന്നു ഇന്ത്യന് സൈന്യത്തിന്റെ പ്രത്യാക്രമണം.
കഴിഞ്ഞ ദിവസം അതിര്ത്തിയില് വെടി നിര്ത്തല് കരാര് ലംഘിച്ച് ഇന്ത്യന് പോസ്റ്റുകള്ക്ക് നേരെ വെടിവെപ്പ് നടത്തിയ മൂന്ന് പാക് സൈനികരെ ഇന്ത്യന് സൈന്യം വധിച്ചിരുന്നു. എന്നാല് 5 ഇന്ത്യന് സൈനികരെ വധിച്ചെന്ന പാകിസ്ഥാന്റെ അവകാശവാദം ഇന്ത്യ തള്ളിയിരുന്നു.
ജമ്മുകശ്മീരിന് പ്രത്യേക പദവി നല്കുന്ന ആര്ട്ടിക്കിള് 370 റദ്ദാക്കിയതിനു പിന്നാലെ പാകിസ്ഥാന് പ്രതിഷേധവുമായി രംഗത്തെത്തിയിരുന്നു. ഇതിനു പിന്നാലെ കശ്മീരിലേക്ക് ഭീകരരെ എത്തിച്ച് സംഘര്ഷാവസ്ഥ സൃഷ്ടിച്ച സംഭവങ്ങള്ക്ക് പിന്നില് ഇന്ത്യയാണെന്ന് വരുത്തി തീര്ക്കാനുള്ള ശ്രമമാണ് പാക് സൈന്യം നടത്തുന്നത്.