തിരുവനന്തപുരം: എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍ക്കെതിരെ ബിജെപി നിലപാട് സ്വീകരിച്ചെന്ന തരത്തില്‍ പ്രചരിക്കുന്ന വാര്‍ത്തകള്‍ വസ്തുതാവിരുദ്ധവും അടിസ്ഥാനരഹിതവുമാണെന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. എന്‍എസ്എസിന്റെ ആഭ്യന്തര കാര്യങ്ങളില്‍ ഒരു കാലത്തും ബിജെപി ഇടപെട്ടിട്ടില്ലെന്നും ഇനിയും ഇടപെടില്ലെന്നും അദ്ദേഹം വ്യക്തമാക്കി.
ഹിന്ദുസമൂഹത്തിലെ ശക്തമായ സമുദായ സംഘടനയായ എന്‍എസ്എസിനെയും അതിന്റെ ജനറല്‍ സെക്രട്ടറി ജി. സുകുമാരന്‍ നായരെയും ബിജെപി ഏറെ ബഹുമാനത്തോടെയാണ് കാണുന്നതെന്ന് രാജീവ് ചന്ദ്രശേഖര്‍ പറഞ്ഞു. ബിജെപി സംസ്ഥാന അധ്യക്ഷനായി കേരളത്തിലെത്തിയ സമയത്ത് എല്ലാ പിന്തുണയും സഹായവും നല്‍കിയ വ്യക്തിയാണ് സുകുമാരന്‍ നായരെന്നും അദ്ദേഹവുമായി തനിക്ക് വ്യക്തിപരമായ അടുപ്പമുണ്ടെന്നും അദ്ദേഹം കൂട്ടിച്ചേര്‍ത്തു.
ലക്ഷക്കണക്കിന് നായര്‍ സമുദായാംഗങ്ങളുടെ ഉന്നമനത്തിനായി പ്രവര്‍ത്തിക്കുന്ന എന്‍എസ്എസിനെയും അതിന്റെ നേതൃത്വത്തെയും രാജ്യം ഭരിക്കുന്ന രാഷ്‌ട്രീയ പാര്‍ട്ടി എന്ന നിലയില്‍ ബിജെപി അതീവ ഉത്തരവാദിത്വത്തോടെയാണ് സമീപിക്കുന്നതെന്നും അദ്ദേഹം പറഞ്ഞു.
ശബരിമല ക്ഷേത്രത്തിലെ താന്ത്രിക ചുമതല ആര്‍ക്ക് നല്‍കണമെന്നത് രാഷ്‌ട്രീയ വിഷയമല്ലെന്നും അതില്‍ അഭിപ്രായം പറയുന്നതിന് ബിജെപിക്ക് പരിമിതികളുണ്ടെന്നും രാജീവ് ചന്ദ്രശേഖര്‍ വ്യക്തമാക്കി. ബിജെപിയുമായി ബന്ധപ്പെട്ട ആരെങ്കിലും ഇക്കാര്യത്തില്‍ പരസ്യ പ്രതികരണം നടത്തിയിട്ടുണ്ടെങ്കില്‍ അത് അവരുടെ വ്യക്തിപരമായ അഭിപ്രായം മാത്രമാണെന്നും അദ്ദേഹം പറഞ്ഞു.
ശബരിമലയുമായി ബന്ധപ്പെട്ട കേസുകളില്‍ തന്ത്രിക്ക് ഭരണപരമായ ചുമതലകളില്ലാത്ത സാഹചര്യത്തില്‍ തന്ത്രി ജയിലിലും എല്ലാം നിയന്ത്രിച്ച മന്ത്രിമാര്‍ പുറത്തുമെന്നതാണ് നിലവിലെ അവസ്ഥയെന്നും അദ്ദേഹം വിമര്‍ശിച്ചു. അഴിമതിക്കാരായ എല്‍ഡിഎഫ് നേതൃത്വത്തിന് സംരക്ഷണം നല്‍കുന്ന യുഡിഎഫ് സര്‍ക്കാരിന്റെ നടപടികളെ വിശ്വാസിസമൂഹത്തോടൊപ്പം ചേര്‍ന്ന് ജനാധിപത്യപരമായി ചെറുത്തുതോല്‍പ്പിക്കുമെന്നും ആചാരങ്ങളും അനുഷ്ഠാനങ്ങളും സംരക്ഷിക്കുന്നതില്‍ ബിജെപി എക്കാലവും വിശ്വാസികള്‍ക്കൊപ്പമാണെന്നും അദ്ദേഹം കൂട്ടിച്ചേര്‍ത്തു.
