കാരയ്ക്കല്: ബംഗാള് ഉള്ക്കടലില് നിന്ന് ഏകദേശം 700 വര്ഷം പഴക്കമുള്ള പുരാതന ശിലാവിഗ്രഹം മത്സ്യത്തൊഴിലാളികള് കണ്ടെത്തി. പുതുച്ചേരിയിലെ കാരയ്ക്കലില് നിന്നുള്ള മത്സ്യത്തൊഴിലാളികള് മഹാബലിപുരം തീരത്ത് മത്സ്യബന്ധനത്തിനിടെ വലയില് കുടുങ്ങിയ നിലയിലാണ് വിഗ്രഹം കണ്ടെത്തിയത്.
ജൂലൈ 10-ന് മത്സ്യബന്ധനത്തിനിടെ വലയ്ക്ക് അസാധാരണമായ ഭാരം അനുഭവപ്പെട്ടതോടെ കൂറ്റന് മീനാണെന്ന് തൊഴിലാളികള് ആദ്യം കരുതി. എന്നാല് വല കരയിലേക്ക് വലിച്ചുകയറ്റിയപ്പോള് കടല്ച്ചെടികളും കക്കകളും മറ്റ് അവശിഷ്ടങ്ങളും പൊതിഞ്ഞ നിലയിലുള്ള പുരാതന ശിലാവിഗ്രഹമാണ് കണ്ടെത്തിയത്.
ഏകദേശം 700 വര്ഷം പഴക്കമുള്ളതാകാമെന്നാണ് വിഗ്രഹത്തെക്കുറിച്ചുള്ള പ്രാഥമിക വിലയിരുത്തല്. ചരിത്രപ്രാധാന്യം മനസ്സിലാക്കിയ മത്സ്യത്തൊഴിലാളികള് വിഗ്രഹം വൃത്തിയാക്കാനോ അതില് മാറ്റം വരുത്താനോ ശ്രമിക്കാതെ കാരയ്ക്കലില് തിരിച്ചെത്തിയ ഉടന് ഡെപ്യൂട്ടി കളക്ടര്ക്ക് കൈമാറുകയായിരുന്നു.
വിഗ്രഹത്തിന്റെ കാലപ്പഴക്കവും ഉത്ഭവവും സംബന്ധിച്ച് പുരാവസ്തു വിദഗ്ധരുടെ സഹായത്തോടെ വിശദമായ പരിശോധന നടത്താനാണ് അധികൃതരുടെ തീരുമാനം. ഇതോടൊപ്പം, ശ്രീലങ്ക കേന്ദ്രീകരിച്ചുള്ള വിഗ്രഹക്കടത്ത് ശൃംഖലയുമായി ഈ കണ്ടെത്തലിന് എന്തെങ്കിലും ബന്ധമുണ്ടോയെന്ന സാധ്യതയും അന്വേഷണസംഘം പരിശോധിക്കുന്നുണ്ട്.
