ലണ്ടന്‍: ഇംഗ്ലണ്ട് ടെസ്റ്റ് ടീമിന്റെ പുതിയ മുഖ്യപരിശീലകനെ കണ്ടെത്താനുള്ള ശ്രമത്തില്‍ മുന്‍ ഇന്ത്യന്‍ പരിശീലകനും ഇതിഹാസ ബാറ്ററുമായ രാഹുല്‍ ദ്രാവിഡിന്റെ പേരും പരിഗണനയില്‍. കഴിഞ്ഞ മാസം ന്യൂസിലന്‍ഡിനോട് സ്വന്തം നാട്ടില്‍ 2-1ന് ടെസ്റ്റ് പരമ്പര തോറ്റതിനെ തുടര്‍ന്ന് ബ്രണ്ടന്‍ മക്കല്ലത്തെ ടെസ്റ്റ് പരിശീലക സ്ഥാനത്ത് നിന്ന് ഇംഗ്ലണ്ട് ആന്‍ഡ് വെയില്‍സ് ക്രിക്കറ്റ് ബോര്‍ഡ് ഒഴിവാക്കിയിരുന്നു.
ഡെയ്ലി ടെലഗ്രാഫ് റിപ്പോര്‍ട്ട് പ്രകാരം, മക്കല്ലത്തിന് പകരക്കാരനായി പരിഗണിക്കുന്ന ചുരുക്കപ്പട്ടികയിലാണ് ദ്രാവിഡിന്റെ പേരും ഉള്‍പ്പെട്ടിരിക്കുന്നത്. മുന്‍ ഇംഗ്ലണ്ട് പരിശീലകന്‍ ആന്‍ഡി ഫ്‌ലവര്‍, മുന്‍ ഇംഗ്ലീഷ് സ്പിന്നര്‍ റിച്ചാര്‍ഡ് ഡോസണ്‍ എന്നിവരും പട്ടികയിലുണ്ട്. നാല് വര്‍ഷം ഇംഗ്ലണ്ടിന്റെ ടെസ്റ്റ് പരിശീലകനായിരുന്ന മക്കല്ലം 49 ടെസ്റ്റുകളില്‍ 27 വിജയവും 20 തോല്‍വിയും സ്വന്തമാക്കിയെങ്കിലും വിദേശപരമ്പരകളിലെ മോശം പ്രകടനമാണ് തിരിച്ചടിയായത്.
ഇന്ത്യയിലും പാകിസ്താനിലും പരമ്പരകള്‍ നഷ്ടമായതും, ഒടുവില്‍ ന്യൂസിലന്‍ഡിനെതിരായ ആഭ്യന്തര പരാജയവും ഇസിബിയെ മാറ്റത്തിന് പ്രേരിപ്പിക്കുകയായിരുന്നു. എന്നാല്‍, ഇംഗ്ലണ്ടിന്റെ വൈറ്റ്-ബോള്‍ ടീമുകളുടെ പരിശീലകനായി മക്കല്ലം തുടരും. 2024ലെ ടി20 ലോകകപ്പില്‍ ഇന്ത്യയെ കിരീടത്തിലേക്ക് നയിക്കുകയും 2023 ലോക ടെസ്റ്റ് ചാമ്പ്യന്‍ഷിപ്പ് ഫൈനലില്‍ ടീമിനെ എത്തിക്കുകയും ചെയ്ത ദ്രാവിഡിന്റെ കൃത്യമായ പരിശീലനശൈലിയും റെഡ്-ബോള്‍ ക്രിക്കറ്റിലെ ആഴത്തിലുള്ള അറിവുമാണ് ഇസിബിയെ ആകര്‍ഷിച്ചിരിക്കുന്നത്.
എന്നാല്‍, ദ്രാവിഡിന് വീണ്ടും മുഴുവന്‍ സമയ പരിശീലക ചുമതല ഏറ്റെടുക്കാന്‍ താല്‍പര്യമില്ലെന്നാണ് റിപ്പോര്‍ട്ട്. എന്നിരുന്നാലും, ഇംഗ്ലണ്ടിന്റെ ടെസ്റ്റ് പരിശീലക സ്ഥാനം വര്‍ഷത്തില്‍ ദീര്‍ഘകാലം വീട്ടില്‍ തുടരാന്‍ അവസരം നല്‍കുന്നതിനാല്‍ അദ്ദേഹത്തിന്റെ താല്‍പര്യം ഇസിബി തേടുമെന്നാണ് റിപ്പോര്‍ട്ടില്‍ പറയുന്നത്. മറ്റു സാധ്യതാ സ്ഥാനാര്‍ഥികളായി കുമാര്‍ സംഗക്കാര, ആന്‍ഡ്രൂ ഫ്‌ലിന്റോഫ്, മൈക്ക് ഹെസണ്‍, ജസ്റ്റിന്‍ ലാംഗര്‍ എന്നിവരുടെയും പേരുകള്‍ പരിഗണനയിലുണ്ടെന്നാണ് റിപ്പോര്‍ട്ട്.
