ന്യൂഡല്ഹി: പുല്വാമ ആക്രമണത്തിനു പിന്നാലെ ബലാക്കോട്ടില് വ്യോമസേന നടത്തിയ ആക്രമണത്തിനു തുടര്ച്ചയായി കരയുദ്ധത്തിനു ഇന്ത്യന് സൈന്യം പൂര്ണസജ്ജമാണെന്ന് കരസേനാധിപന് ജനറല് ബിപിന് റാവത്ത് സര്ക്കാരിനെ അറിയിച്ചിരുന്നതായി വെളിപ്പെടുത്തല്. പാകിസ്ഥാന് കരയുദ്ധം നടത്തിയാല് അവരുടെ മണ്ണില് കടന്നും യുദ്ധം ചെയ്യാന് സൈന്യം സന്നദ്ധമാണെന്ന് അദ്ദേഹം അറിയിച്ചതായാണ് റിപ്പോര്ട്ട്.
ഈ വര്ഷം ഫെബ്രുവരി 14നാണ് പാകിസ്ഥാന് ആസ്ഥാനമായുള്ള ജയ്ഷെ മുഹമ്മദ് ഭീകരര് ജമ്മുകശ്മീരിലെ പുല്വാമയില് നടത്തിയ ഭീകരാക്രമണത്തില് 40 സി.ആര്.പി.എഫ് ജവാന്മാര് വീര്യമൃതു വരിച്ചത്. ആക്രമണത്തിന് മറുപടി എങ്ങനെ നല്കണമെന്ന് സര്ക്കാര് ആലോചിക്കുമ്പോഴായിരുന്നു ജനറല് റാവത്തിന്റെ പ്രഖ്യാപനം. തിങ്കളാഴ്ച വിരമിച്ച കരസേനാ ഉദ്യോഗസ്ഥരുമായി ബിപിന് റാവത്ത് നടത്തിയ ചര്ച്ചയില് പങ്കെടുത്തയാളാണ് ഇക്കാര്യം വെളിപ്പെടുത്തിയത്. യുദ്ധത്തിന് കരസേന പൂര്ണമായും തയ്യാറായിരുന്നു.
2016 സെപ്റ്റംബറിലെ ഉറി ഭീകരാക്രമണത്തിനു ശേഷം 11000 കോടി രൂപയുടെ പടക്കോപ്പുകള് വാങ്ങാന് കരസേന കരാറൊപ്പിട്ടിരുന്നു. ഇതില് 95 ശതമാനവും ലഭിച്ചു. 7000 കോടി രൂപയുടെ 33 കരാറുകളുടെ കാര്യത്തില് അന്തിമതീരുമാനമായിട്ടുണ്ടെന്നും 9000 കോടി രൂപയുടെ ആയുധങ്ങള് കൂടി വാങ്ങുന്നതിനുളള ചര്ച്ച പൂര്ത്തിയായെന്നും കേന്ദ്രങ്ങള് അറിയിച്ചു.
