ന്യൂഡല്ഹി: വ്യോമസേനയ്ക്ക് ശക്തി പകരാന് കൂടുതല് സുഖോയ് വാങ്ങുന്നു. പഴക്കം ചെന്ന ജാഗ്വര് വിമാനങ്ങളുടെ എന്ജിന് നവീകരിക്കാനുള്ള തീരുമാനം മാറ്റിവച്ചാണ് പകരം പുതിയ സുഖോയ് 30 എംകെഐ വിമാനങ്ങള് വാങ്ങാന് തീരുമാനിച്ചത്. നവീകരണം നിര്ത്തുന്നതോടെ ജാഗ്വര് വ്യോമസേനയുടെ യുദ്ധമുഖത്തു നിന്നും ക്രമേണ നീക്കം ചെയ്യും. കാലപ്പഴക്കം ചെന്ന മിഗ് 21, 27 വിമാനങ്ങളും വരും വര്ഷങ്ങളില് ഒഴിവാക്കും.
ജാഗ്വര് വിമാനങ്ങളുടെ എന്ജിന് നവീകരണത്തിനു ചെലവാകുന്ന തുകയില് പുതിയ വിമാനങ്ങള് വാങ്ങാന് കഴിയുമെന്ന വിലയിരുത്തലിലാണ് പുതിയ തീരുമാനം. ഹിന്ദുസ്ഥാന് എയ്റോനോട്ടിക്സ് ലിമിറ്റഡ്( എച്ച്എഎല്) ആണു സുഖോയ് നിര്മ്മിക്കുന്നത്. റഷ്യയുടെ സഹായത്തോടെ നിലവിലുള്ള സുഖോയ് വിമാനങ്ങളുടെ ആയുധ, സാങ്കേതിക സംവിധാനങ്ങള്ക്ക് കരുത്തുറ്റത്താക്കാനും പരിഗണനയിലുണ്ട്.
മേക്ക് ഇന് ഇന്ത്യ പദ്ധതിയിലൂടെ വിദേശ പങ്കാളിത്തതോടെ 144 യുദ്ധവിമാനങ്ങള് നിര്മിക്കാനുള്ള പദ്ധതിക്കു പ്രതിരോധ മന്ത്രാലയം തുടക്കമിട്ടിട്ടുണ്ട്. നിലവില് 31 ഫൈറ്റര് സ്ക്വാഡ്രണുകളാണ് സേനയ്ക്ക് ഉള്ളത്. സുഖോയ് 30 എംകെഐ, ജാഗ്വര് എന്നിവയ്ക്കു പുറമെ മിഗ് 21, മിഗ് 27, മിഗ് 29, മിറാഷ് 2000 എന്നിവയാണ് നിലവില് സേനയുടെ പക്കലുള്ളത്.
പാക്കിസ്ഥാനിന്റെയും ചൈനയുടെയും അതിര്ത്തികളില് ആകാശക്കാവലൊരുക്കാന് റഫാല് യുദ്ധവിമാനങ്ങള് അടുത്ത മാസം മുതല് ഇന്ത്യയില് എത്തിത്തുടങ്ങും.