ചെന്നൈ: മത്സരങ്ങള്ക്കിടെ പാലിക്കേണ്ട പെരുമാറ്റച്ചട്ട ലംഘനത്തിന് ഇന്ത്യന് വിക്കറ്റ് കീപ്പര് ബാറ്റ്സ്മാന് ദിനേശ് കാര്ത്തിക്കിന് ബിസിസിഐ നിരുപാധികമാപ്പ് നല്കി. വെസ്റ്റിന്ഡീസിലെ ഇന്ത്യന് മത്സരത്തിനിടെ കരീബിയന് ലീഗ് മത്സരങ്ങള് കണ്ടതിന്റെ പേരിലാണ് അച്ചടക്ക നടപടി എടുത്തത്.
കാര്ത്തിക് എഴുതി തയ്യാറാക്കിയ മാപ്പപേക്ഷ സ്വീകരിച്ചതായും ഇനി നടപടികളെല്ലാം അവസാനിച്ചതായും ബിസിസിഐ വൃത്തങ്ങള് അറിയിച്ചു.കഴിഞ്ഞ വിന്ഡീസ് പര്യടന സമയത്താണ് കാര്ത്തിക് ഷാരൂഖ് ഖാന്റെ ഉടമസ്ഥ പങ്കാളിത്തമുള്ള ട്രിന്ബാഗോ കൊല്ക്കത്താ നൈറ്റ് റൈഡേഴ്സിന്റെ വിശ്രമമുറിയിലിരുന്ന് കരീബിയന് ലീഗ് ക്രിക്കറ്റ് മത്സരം നേരില് കണ്ടത്.
ഇന്ത്യന് ടീമിന്റെ ഭാഗമായിരിക്കേ വെസ്റ്റിന്ഡീസിലെ പോര്ട്ട് ഓഫ് സ്പെയിനില് നടന്ന കരീബിയന് ലീഗ് കാണാനാണ് പര്യടനത്തിനിടെ കാര്ത്തിക് പോയത്.നിലവില് ഇന്ത്യന് പ്രീമിയര് ലീഗില് ഷാരൂഖ് ഖാന്റെ ടീമായ കൊല്ക്കത്ത നൈറ്റ് റൈഡേഴ്സ് ക്യാപ്റ്റനാണ് കാര്ത്തിക്. ഇതേ ടീമിന്റെ പരിശീലകനായ ന്യൂസിലാന്റ് താരം ബ്രന്റന് മക്കുല്ലത്തിന്റെ അഭ്യര്ത്ഥന മാനിച്ചാണ് കളികാണാന് പോയതെന്നും അവിടെ വച്ച് അവരാണ് ട്രിന്ബാഗോ ജഴ്സി അണിയിപ്പിച്ചതെന്നുമാണ് ദിനേശ് കാര്ത്തിക് മാപ്പപേക്ഷയില് വ്യക്തമാക്കിയത്.
ബിസിസിഐയുടെ കരാര് പ്രകാരം ദേശീയ ടീമീന്റെ ഭാഗമായിരിക്കെ മറ്റൊരു സ്വകാര്യ ക്രിക്കറ്റ് സംബന്ധമായ ഒന്നിലും ഏര്പ്പെടാനോ പരസ്യങ്ങളുടെ ഭാഗമാകാനോ പാടുള്ളതല്ല എന്ന കരാറിന്റെ ലംഘനമാണ് കാര്ത്തിക് ലംഘിച്ചത്. കളികാണുന്ന ചിത്രം പ്രചരിച്ചപ്പോഴാണ് വിഷയം ബിസിസിഐയുടെ ശ്രദ്ധയില്പ്പെട്ടത്.
