ന്യൂഡല്ഹി: ഇന്ത്യന് സൈനികരെ കൊലപ്പെടുത്തിയ കേസ്സിലുള്പ്പടെ ജമ്മുകശ്മീര് ലിബറേഷന് ഫ്രന്റ്(ജെ കെ എല് എഫ്) നേതാവായ യാസിന്മാലിക്കിന് കടുത്ത ശിക്ഷ ഉറപ്പാക്കാന് എന്ഐഎ. ഇന്ത്യന് പാര്ലമെന്റ് മന്ദിരം ആക്രമിക്കുന്നതില് മുഖ്യസൂത്രധാരനായ അഫ്സല് ഗുരുവിന് നല്കിയ വധശിക്ഷ യാസിന് മാലിക്കിനും നല്കണമെന്ന ആവശ്യമാണ് ദേശീയ അന്വേഷണ ഏജന്സി കോടതിയില് ഉന്നയിക്കുക.
ഭാരതീയ സൈനികരെ കൊലപ്പെടുത്തിയ മുപ്പതുവര്ഷത്തെ പഴക്കമുള്ള ഭീകരാക്രമണത്തിന് നേതൃത്വം വഹിച്ച യാസിന് മാലിക് നിലവില് തീഹാര് ജയിലിലാണ്. രണ്ടു വ്യത്യസ്ത കേസ്സുകളാണ് മാലിക്കിനെതിരെ ചുമത്തിയിരിക്കുന്നത്. 1990ല് നാല് വ്യോമസേനാ ഉദ്യോഗസ്ഥന്മാരെ വധിച്ച കേസ്സാണ് ഇതില് പ്രധാനം. 40 പേരടങ്ങുന്ന വ്യോമസേനാ സംഘത്തിന് നേരെ യാണ് യാസിന് മാലിക്കും സംഘവും ആക്രമണം നടത്തിയത്. സംഭവത്തില് നാല് സൈനികരാണ് വീരമൃത്യു വരിച്ചത്. 1989ല് മുഫ്തി മുഹമ്മദ് സെയ്ദിന്റെ മകളെ തട്ടിക്കൊണ്ട്പോയ കേസ്സാണ് മറ്റൊന്ന്.
സിബിഐ ഈ രണ്ടുകേസ്സുകളിലും കുറ്റപത്രം സമര്പ്പിച്ചതാണ്. 1990 ആഗസ്റ്റിലും സെപ്തംബറിലുമായി കുറ്റപത്രം സമര്പ്പിച്ചിരുന്നെങ്കിലും 1995ല് പ്രത്യേക കോടതി മാലിക്കിന്റെ വിചാരണ തടയുകയായിരുന്നു.ജമ്മുകശ്മീരിലെ ടാഡാ കോടതി ഇല്ലാത്തതിന്റെ സൗജന്യവും വിചാരണയ്ക്ക് തടസ്സമായി നില്ക്കുന്നു.2008ല് തനിക്ക് സുരക്ഷാപ്രശ്നമുള്ളതിനാല് ശ്രീനഗറിലെ കോടതിയിലേയ്ക്ക് കേസ്സ് മാറ്റണമെന്ന ആവശ്യവും മാലിക് ഉന്നയിച്ചിരുന്നു.